Así é LuGaz, o millonario proxecto de biometano ao que renuncia Carmen Lence

A semana pasada Carmen Lence, CEO do maior grupo lácteo galego, anunciaba a decisión de cancelar o proxecto para levantar unha planta de biogás en O Cevao ante as «constantes trabas» ás que se viña enfrontando e a un clima de confrontación xerado ao seu redor. A iniciativa LuGaz nacera co obxectivo de tratar o esterco local e os residuos agroalimentarios para a produción de biogás e biofertilizantes “dende a perspectiva do residuo cero e a economía circular”.

O proxecto, no que o grupo Lence participaba xunto ás súas socias Norvento, Agroamb e Medrar Smart Solution, foi declarado estratéxico pola Xunta de Galicia o pasado 18 de setembro. Segundo as previsións, a planta, que contaría cun investimento de 7,5 millóns de euros, permitiría a creación de 30 postos de traballo, dos cales 10 deles serían de carácter directo.

“LuGaZ busca crear unha instalación sostible de cero residuos que xestione os residuos orgánicos e non perigosos xerados principalmente na cadea de valor do sector lácteo, e que brinde a oportunidade a outras industrias agroalimentarias da zona de xestionar os seus residuos”, detalla a páxina web do proxecto.

A tecnoloxía de LuGaz

As instalacións combinarían unha planta de biogás cunha tecnoloxía orientada ao tratamento do digestato –o residuo líquido ou sólido que queda despois da descomposición anaeróbica (sen osíxeno) de materia orgánica nas plantas de biogás–, e un tratamento sólido para a produción de fertilizantes.

En concreto, a tecnoloxía do proxecto apoiaríase en tres piares. O primeiro deles o de Optiblender, un software especializado que traballaría na liña de dixestión anaeróbica que garantiría “a estabilidade e a calidade do digestato producido a través da optimización de mesturas de co-dixestión”.

En segundo lugar estaría o sistema Nidup, deseñado especificamente para aplicacións de pequena escala e altamente competitivo debido aos seus “menores custos de operación, a capacidade de manexar altas concentracións de sulfuro de hidróxeno (H2S) e o potencial de minimizar as necesidades de reactivos/consumibles”.

En último lugar estaría o sistema Depurgan/Aquatec, unha solución de baixo custo para o tratamento de líquidos que traballa baseado nun proceso de electrocoagulación, no que se emprega a corrente eléctrica para eliminar axentes contaminantes.

Con todo iso conseguiríase separar ese digestato nunha fracción sólida, coa que se crearía un fertilizante orgánico que se destinaría ao sector primario, e unha parte líquida, que se recuperaría para reutilizala en aplicacións industriais.

Capacidade da planta

Segundo os cálculos do proxecto, a planta xestionaría aproximadamente 55.000 toneladas de residuos ao ano para producir biogás con metano, que sería capturado, purificado e optimizado antes de ser inxectado á rede de gas natural. Estímase que, durante os primeiros dez anos de operación, esta planta permitiría evitar a emisión de arredor de 51.604 toneladas de dióxido de carbono anuais.

“Lu GaZ contribuirá a acadar a neutralidade climática para 2050 mediante a produción de biometano de alta calidade. Ademais, o proxecto permitirá a recuperación de enerxía renovable a partir do esterco, reducindo as emisións de GEI da agricultura, que representan aproximadamente o 11 % do total”.

A xestión dos residuos axudaría a reducir as emisións de metano procedentes do almacenamento de esterco a ceo aberto e dos vertedoiros, “que se atopan entre as maiores fontes deste tipo de emisións na UE”.

Renuncia ao proxecto

Carmen Lence explicou este luns, nunha entrevista na Cadena Ser, que “todo ía ben pola vía da transparencia, pola vía do diálogo, ata que uns grupos políticos empezaron a montar as súas sesións informativas por conta propia, en particular unha do día 6 de outubro, na que participaron o tenente de alcalde de Lugo e portavoz do BNG, Rubén Arroxo, a doutora en enxeñaría agrónoma, Montse Valcárcel e tamén un técnico de ADEGA. Estas xornadas montáronse para os veciños, nós pedimos poder ir e non se nos deixou e iso que nós tamén somos veciños, tanto nós como a xente de Norvento”.

A presidenta do grupo Lence sinalou que empezaron a notar que o proxecto “empezaba a politizarse”. “Empezamos a ver que hai un ton en contra deste proxecto e que nos empeza a parecer que isto é volver a montar manifestacións, como xa estamos afeitos, para desprestixiar principalmente o nome das empresas que están detrás disto” algo que cualificou como “extremadamente perigoso”.

“Nós non nos podemos permitir o luxo de que a xente empece a desprestixiarnos porque a nosa principal responsabilidade é a de manter os postos de traballo”.