Carmen Lence (Leche Río) renuncia ao proxecto da planta de biogás de Lugo ante a contestación social.

Grupo Lence, Norvento, Agroamb e Medrar Smart Solutions dan marcha atrás co seu proxecto para levantar unha planta de biogás en O Ceao. Carmen Lence, CEO do maior grupo lácteo galego, anunciou a súa renuncia ante as “constantes trabas” ás que se viña enfrontando.

A través dunha columna de opinión no xornal O Progreso, Carmen Lence asegura que se trataba de “un proxecto innovador, sostible e 100% galego”. “O proxecto LuGaz era unha forma de facer o que tantas veces dicimos que queremos: apostar pola innovación, pola sostibilidade e polo futuro do rural. E ademais, facelo desde a realidade do territorio. Lugo é a provincia con máis vacas de muxido en España. O leite e as ganderías non son un sector máis: son o corazón económico e social da provincia. Mantén vivo o campo, sostén miles de familias, prevén o abandono rural e ten un gran potencial de crecemento. Pero tamén necesitan solucións reais”, defendía a empresaria galega.

A súa xuízo, esta iniciativa supoñía “unha oportunidade extraordinaria para Lugo” e daba resposta a “un problema urxente” como é o da xestión dos puríns. “Conseguimos a subvención europea e demos para adiante ao proxecto. A Xunta declárao Proxecto Industrial Estratéxico (PIE). Preséntase publicamente aos medios, aos partidos políticos e aos representantes das asociacións veciñais. Todo avanza ben, pola vía da transparencia, os datos e o diálogo -relata-. Ata que comeza a avanzar por outra vía“.

“A dos rumores. A das reunións informativas onde, curiosamente, non se convida a quen pode explicar os detalles técnicos. A de imos crer o que queremos crer sen ter en conta as evidencias. A de deseñar logos con fábricas fumeantes e consignas reivindicativas. A de preparar os chalecos e programar as protestas“, censurou a CEO do Grupo Lence Torres.

“Para aforrarlle á sociedade esta película tan repetida, e aos que ían comprar o chaleco de Non aos cheiros de LuGaz, 10 euros, Grupo Lence abandona o proxecto LuGaz“, avanza a empresaria. “Non estamos dispostos a ser os protagonistas da mesma película que xa vimos ata a saciedade onde os únicos beneficiados son os que pretenden facer política a costa da reivindicación de tumo”, recalcou, antes de apuntar o “irónico” de “que a principal afectada por eses supostos cheiros sería precisamente a promotora do proxecto, Grupo Lence, xa que a planta estaría dentro das nosas propias instalacións”.

“¿De verdade alguén pode crer que estamos tan tolos como para meter cheiros a purín nas nosas propias instalacións?”, pregunta Carmen Lence na columna de opinión publicada no xornal O Progreso.

Adeus a nove millóns de euros de investimento

Deste xeito, Galicia queda sen este proxecto que contemplaba a construción dunha planta de 6.000 metros cadrados xunto ás instalacións de Leite Río no polígono lucense de O Ceao. A iniciativa ía supoñer unha investimento de uns nove millóns de euros, dos cales sete xa foran concedidos previamente por instancias europeas.

A folla de ruta Grupo Lence, Norvento, Agroamb e Medrar Smart Solutions apuntaba, ademais, á creación de 30 novos postos de traballo a través destas instalacións nas que se tratarían 55.000 toneladas anuais de residuos.