Cobas, a xestora de Paramés, roza os 3.500 millóns baixo xestión tras un 2025 de récord cos seus fondos.

Cobas Asset Management suma e segue. A xestora impulsada polo investidor ferrolán Francisco García Paramés pechou 2025 con 3.454 millóns de euros baixo xestión, o que supón un crecemento de preto do 50% fronte ao ano anterior, segundo informou este venres nun comunicado.

O incremento débese tanto ao aumento do número de partícipes (creceu un 16%, ata os 36.126), que supuxo 420 millóns de euros en captacións netas, ademais do “bo comportamento das carteiras”.

“Estamos traballando activamente en preparar a xestora e a compañía para unha nova fase de madurez, anticipándonos de forma ordenada ao momento no que algunhas das nosas estratexias principais alcancen o seu tamaño óptimo”, afirmou o director xeral de Cobas AM, Gonzalo Recarte.

A firma anticipa un peche parcial das súas “estratexias principais” para preservar a capacidade de xeración de valor, co umbral situado entre os 4.500 e 5.000 millóns de euros.

En canto ás rendibilidades das carteiras, Cobas Selección pechou o ano cun 31%; Cobas Internacional, cun 26%; Cobas Iberia, cun 53%; Cobas Grandes Compañías, cun 32%; e Cobas Concentrados, un 47%. Os plans de pensións tamén mostraron un “sólido comportamento”, con rendibilidades de ata o 31% en Cobas Global e plans de emprego e do 23% en Cobas Mixto Global.

Neste sentido, desde Cobas Asset Management reivindican que as carteiras manteñen potenciais de revalorización superiores ao 100% nas estratexias internacionais e próximos ao 80% na ibérica, segundo cálculos do equipo xestor, con ratios de cotizacións sobre beneficios de entre sete e nove veces.