Comisións Obreiras carga contra Navantia e pide máis investimentos e un plan de emprego
O sindicato critica o Plan Estratéxico 2026-29 da empresa pública ao considerar que "as solucións pasan por axustes organizativos, flexibilidade laboral e reordenación de plantilla".
O presidente de Navantia, Ricardo Domínguez, durante un acto nos estaleiros de Ferrol / Navantia.
Comentarios
CCOO volve á carga contra Navantia. O sindicato denunciou este mércores que o Plan Estratéxico 2026-2029 da empresa pública repite unha fórmula antiga, baseada en grandes anuncios, obxectivos “inflados, moita propaganda e, unha vez máis, a plantilla colocada no centro dos sacrificios”.
Desde Comisións Obreiras apuntan que o propio documento recoñece “problemas estruturais” que CCOO leva anos denunciando, como é a subactividade, a dependencia de decisións políticas, elevados custos na organización estrutural da empresa sen beneficio económico e ausencia dunha planificación industrial estable.
“O grave é que, unha vez máis, as solucións pasan por axustes organizativos, flexibilidade laboral e reordenación de plantilla, é dicir, por trasladar e aumentar a presión ás persoas traballadoras en lugar de afrontar o verdadeiro debate de fondo: que modelo industrial necesita Navantia e se existe compromiso real para sostelo”, reprochou o sindicato nun comunicado.
É por iso que Comisións Obreiras esixiu a SEPI transparencia para evitar unha “privatización encuberta” da empresa pública, así como un rexuvenecemento da plantilla mediante o aumento da contratación de persoal propio para evitar a perda de coñecemento e man de obra, e claridade nas inversións, que deben garantirse mediante orzamentos “firmes e claros” para unha modernización que garanta a competitividade con estaleiros punteiros.
En paralelo, desde CCOO tamén consideran “inaceptable” o feito de que, ao seu xuízo, non exista vontade real de negociación cos representantes dos traballadores, dado que o plan estratéxico entregouse con apenas uns días de marxe. “É evidente que a dirección menospreza o diálogo social, a participación e a negociación. Únicamente queren cubrir o expediente”, reiterou.
Á volta cos números do plan de Navantia
Segundo CCOO, o plan vende obxectivos ambiciosos como duplicar ingresos, aumentar marxes, medrar en emprego e acadar unha alta ocupación industrial, pero o propio texto admite que todo iso depende de factores externos como programas do Ministerio de Defensa, decisións da UE ou a evolución xeopolítica.
Tamén se insiste, engadiu o sindicato, na redución de custos, a diminución de persoal indirecto, o aumento da eficiencia e a transformación dixital, o que, ao seu xuízo, se traducirá en máis presión produtiva, reorganización de postos, risco de precarización e máis espazo para a externalización encuberta.
“CCOO téñeno claro: sen un plan de emprego, sen investimentos, sen formación real e sen participación da plantilla, todo é puro escaparate. Moita tecnoloxía no papel e pouca mellora produtiva”, denunciou o sindicato, que engadiu que o futuro de Navantia non pode construírse “contra os seus traballadores e traballadoras, nin ao marxe da súa representación sindical”.
