Coren doa máis de 50.000 quilos de comida para animais ás granxas afectadas polos incendios

Coren arrólase coa loita contra os incendios. O grupo de base cooperativa doou máis de 50.000 quilos de alimento para animais destinados ás explotacións que se viron afectadas polos lumes deste mes de agosto. A compañía ourensá abasteceu a granxas dos concellos de Chandrexa de Queixa, Viana e Manzaneda.

Trátase de granxas que se atoparon en situación de especial emerxencia como consecuencia da proximidade do lume ás explotacións e que, ademais, perderon os forraxes que tiñan destinados á alimentación dos animais, segundo indica a compañía nun comunicado.

Coordinación con administracións e gandeiros

Coren colaborou cos técnicos de Medio Rural, os concellos e as asociacións de gandeiros para o reparto, de maneira que puidese realizarse unha distribución coordinada entre as explotacións afectadas en función da urxencia das súas necesidades. A doazón realizada incluíu alimentación para vacún de leite e cordeiros.

A maior empresa ourensá por ingresos colaborou tamén no reparto de pacas de palla para as granxas afectadas, neste caso achegando transporte para realizar a distribución do forraxe.

Contacto coas granxas

Á parte da doazón para as granxas directamente afectadas polos lumes, o equipo comercial do Departamento de Alimentación Animal da cooperativa intensificou os seus contactos coa súa rede de clientes habituais, para facilitarlles o subministro de penso e garantir a dispoñibilidade a todas as granxas do entorno, nas cantidades e prazos adaptados ás súas necesidades.