Energo-Pro, propietaria de Xeal, acelera a súa expansión coa compra dunha central en Brasil por 260 millóns.

Energo-Pro suma e segue. A compañía checa, que hai dous anos tomou o control da galega Xeal, anunciou a adquisición do 100% da central hidroeléctrica Baixo Iguaçu, situada no estado brasileiro de Paraná.

Trátase dunha instalación que conta cunha capacidade instalada de 350 megavatios, unha cantidade que duplica os 167 megavatios que desprega en Galicia a través das súas dez centrais hidráulicas dos ríos Xallas e Grande (Fervenza I e II, Ponte Olveira I e II, Novo Castrelo, Castrelo, Santa Uxía I e II, Novo Pindo e Carantoña).

Energo-Pro desembolsou 260 millóns de euros para pechar esta operación que supón a maior inversión checa en Sudamérica ata a data. “Con esta incorporación, Baixo Iguaçu pasa a ser a central con maior potencia do grupo Energo-Pro“, destaca a firma a través dun comunicado.

A compra desta central á brasileira Copel financiouse con efectivo dispoñible e financiamento externo. Nesta liña enmárcanse os eurobonos verdes por valor de 750 millóns de euros e vencemento en 2030 cun cupón do 8% que a compañía emitiu na primeira metade deste ano.
“A exitosa emisión do noso primeiro eurobono verde proporcionounos unha base estable para un maior crecemento e desenvolvemento no campo das enerxías limpas”, precisou Jakub Fajfr, CEO de Energo-Pro.

Energo-Pro pon o foco en Latinoamérica

Na nota de prensa, a firma checa pon de relevo que este movemento “representa outro fito na expansión estratéxica da compañía en Latinoamérica“. “Á exitosa adquisición de sete centrais eléctricas máis pequenas cunha capacidade total de 90 megavatios en 2024, segue a adquisición dunha central hidroeléctrica moderna e eficiente con contratos de compravenda a longo prazo”, recalca a empresa.

«O crecemento da nosa carteira en Latinoamérica constitúe un paso estratéxico na diversificación xeográfica do noso grupo. Isto reforza a nosa resiliencia ante as fluctuacións hidrolóxicas, xeopolíticas e económicas», precisou Jakub Fajfr, CEO do grupo checo.

E é que Energo-Pro tamén está construíndo unha nova central hidroeléctrica, Chorreritas, en Colombia, cuxa posta en marcha está prevista para 2026. Estes 20 megavatios sumaranse aos 1.850 que xa ten en carteira a través das 54 centrais hidroeléctricas que desprega en Bulgaria, Xeorxia, Turquía, España e Brasil.