EY promociona a Marcos Piñeiro e póñeno á fronte da área fiscal e legal en Galicia

EY Avogados reforza a súa aposta por Galicia. A entidade nomeou a Marcos Piñeiro novo socio equity da área fiscal e legal en Galicia.

“A promoción enmárcase no plan estratéxico de EY Avogados orientado a ofrecer solucións adaptadas a cada mercado e segmento”, explica a firma. Graduado en Dereito pola Universidade de Vigo, Piñeiro incorporouse a EY en 2017 tras poñer punto final a unha etapa de 11 anos en Garrigues e desde 2021 exerce como socio responsable da área fiscal de EY Avogados en Galicia.

“Pelayo Novoa, socio responsable das oficinas de EY en Galicia, destacou: “A promoción de Marcos é un recoñecemento a unha traxectoria marcada polo rigor técnico, a proximidade co cliente e un profundo coñecemento do tecido empresarial galego. O seu liderado será clave para seguir acompañando ás empresas de Galicia nun momento de transformación e expansión internacional”.

Por outra banda, Adolfo Zunzunegui, socio director de EY Avogados, subliñou que “Galicia é unha comunidade cun dinamismo propio e con sectores empresariais cada vez máis sofisticados. A experiencia de Marcos e a súa estreita vinculación con este entorno permitenlle achegar un valor singular ás empresas galegas e acompañar ese desenvolvemento desde EY Avogados, nun momento no que a comunidade vive unha etapa de gran impulso económico e empresarial”.

“É un honor asumir esta nova responsabilidade dentro de EY, especialmente nunha rexión con tanto talento e cun ecosistema empresarial tan dinámico como o galego”, declarou Marcos Piñeiro. “O meu compromiso é seguir contribuíndo a que os nosos clientes afronten con éxito os seus desafíos fiscais e estratéxicos nun entorno cada vez máis global”, precisou.

Desde EY reivindican a Marcos Piñeiro como “un dos profesionais de referencia en Galicia en fiscalidade corporativa e asesoramento á empresa familiar”. “Desde a súa incorporación a EY en 2017, impulsou o crecemento da área fiscal e legal na comunidade mediante un acompañamento próximo e especializado a compañías galegas nos seus procesos de expansión e internacionalización”.

Piñeiro compaxina a súa labor en EY coa docencia en escolas de negocios como IESIDE, UIE e IFFE Business School -onde coordina o Mestrado de Asesoría Fiscal e Contable– así como en diversas universidades públicas galegas, contribuíndo activamente a atraer, impulsar e desenvolver talento local.

Deste xeito, EY Avogados, que vén de pechar 2025 cunha facturación por valor de 233,1 millóns de euros (un 9% máis que en 2024) reforza a súa aposta por Galicia. “Nestes momentos entre A Coruña e Vigo hai máis dun cento de profesionais, unha estrutura que permite abordar proxectos de maior envergadura e ampliar a presenza da firma en sectores tractores da comunidade”.