Falece José María Castellano, o tándem perfecto con Amancio Ortega en Inditex que presidiu Novagalicia e ONO
O catedrático da UDC, que actualmente desempeñaba a presidencia de Greenalia, foi un dos executivos máis duradeiros en Inditex, que abandonou en 2005, para pasar á presidencia de grupos como ONO ou Navagalicia.
Jose María Castellano. Europa Press. Archivo
Comentarios
Galicia despede a un dos seus executivos máis brillantes e cunha intensa traxectoria que o levou a saltar de postos de máxima responsabilidade nas máis diversas compañías. Catedrático da Universidade da Coruña e ata agora presidente de Greenalia, da que era o seu segundo accionista, José María Castellano Ríos (A Coruña, 15 de Xullo de 1947) faleceu esta madrugada en Madrid por causa das complicacións dunha enfermidade que arrastraba desde hai anos e da que se recuperara en varias ocasións.
O catedrático da UDC foi un dos executivos máis duradeiros en Inditex, que deixou en 2005, para pasar á presidencia de grupos como ONO ou Navagalicia. Ao grupo de Amancio Ortega incorporouse en 1984, e foi o artífice da súa estrutura financeira e da súa expansión, sempre da man do presidente. Iso sucedeu así, ata o mencionado ano, coa tentativa de compra de Unión Fenosa por parte dun grupo de grandes fortunas galegas fronte á opción de Florentino Pérez cando a eléctrica estaba en mans do Banco Santander. A relación saltou polos aires. Caste ocupaba entón a vicepresidencia de Inditex.
De Inditex a Novagalicia
Tras deixar o grupo téxtil, o executivo coruñés reinventouse e accedeu á presidencia de Novagalicia Banco (entón Novacaixagalicia) para reflotar un proxecto, o das caixas das caixas galegas fusionadas, para o que intentou persuadir ao FROB, propietario nese momento da entidade, sobre as bondades de que se fixesen co seu control fondos de investimento. Finalmente, Abanca foi a opción gañadora en subasta.
A súa fortuna
No ámbito da xestión da súa fortuna, Nakadama e Alazady, as dúas ferramentas de investimento que manexaba Castellano, foron constituídas entre novembro e decembro de 2001, apenas uns meses despois da saída a Bolsa do xigante téxtil. Hoxe en día, os activos xestionados a través de Nakadama sitúanse arredor dos 40 millóns de euros. Desta firma colgan outras dúas sociedades de forma directa (Alazady España e Inversiones Alazady), e opera como sociedade dominante dentro do grupo patrimonial de Castellano.
