Hijos de Rivera crea a súa primeira filial de Estrella Galicia en Italia

Corporación Hijos de Rivera crea a súa primeira filial en Italia. A compañía continúa así co seu proceso de expansión internacional sumando unha delegación máis fóra das fronteiras españolas tras a apertura no Reino Unido do pasado ano. Neste caso trátase de Estrella Galicia Italia, “unha sociedade propia desde a que afrontará a partir de agora o desenvolvemento comercial no país dos seus produtos”.

Segundo traslada a empresa, esta filial ten como obxectivo “impulsar o crecemento das vendas dos produtos da compañía neste mercado cunha cultura cervexeira moi consolidada, que neste momento abandeiran as cervexas Estrella Galicia e a gama 1906, pero que conta cun gran potencial para a introdución de novas referencias”.

Para o Director Xeral de Corporación Hijos de Rivera, Francisco Ucha, contar cunha filial propia en Italia permitirá “acelerar” o desenvolvemento da compañía nun mercado cun “enorme potencial” para os seus produtos.

“Unha maior capilaridade, proximidade e capacidade de servizo darán un impulso ao noso crecemento nun país clave para o noso plan de expansión internacional”, apunta.

Así, concreta, a empresa “axilizará a súa capacidade de distribución no país coa creación de almacéns propios e desenvolverá unha rede de equipos sobre o terreo nas principais rexións italianas co propósito de facilitar unha atención máis próxima e local aos clientes e de supervisar o posicionamento das marcas nos puntos de venda”.