Greenalia pon en marcha o seu parque solar nos EE UU, co que prevé gañar máis de 40 millóns ao ano

Greenalia comeza a operar nos Estados Unidos. A previsión da compañía era poñer en funcionamento o seu parque fotovoltaico Misae II, ubicado en Texas, este verán, e así aconteceu. Nun comunicado ao MARF, o grupo galego de renovables informa de que iniciou a exportación de enerxía á rede producida coa súa nova planta, que controla a través da filial norteamericana Excel Advantage Services, LLC. A compañía que dirixe Manuel García Pardo investiu máis de 500 millóns en poñer en marcha a instalación.

Na súa primeira fase, o parque fotovoltaico comeza a operar con 215MW, os cales irán entrando en funcionamento de forma progresiva nas próximas semanas. A segunda fase, suporá a entrada en funcionamento doutros 215MW (ata un total de 430MW instalados), e está previsto que entre en funcionamento ao longo do mes de setembro.

O proxecto, que consuma o desembarco do grupo galego nos Estados Unidos, xerará uns 60 millóns de dólares anuais de ingresos, segundo as estimacións de Greenalia, que prevé obter un ebitda superior aos 50 millóns de dólares (42 millóns de euros) da actividade de Misae II.

Accelera nos Estados Unidos

Na súa comunicación ao MARF, Greenalia tamén informa dunha serie de cambios normativos nos Estados Unidos e España que afectan ao sector e aos que adaptará o desenvolvemento dos seus proxectos. A priori, todos os considera favorables. Especialmente no país de Donald Trump, onde a revisión do proxecto de lei fiscal mantén ata 2030 os créditos fiscais (coñecidos como Tax Equity) outorgados pola Lei de Redución da Inflación (Inflaction Reduction Act) para os proxectos que inicien a súa construción nun prazo de 12 meses tras a aprobación da norma (que tivo efecto o 4 de xullo do 2025).

“Esta aprobación supón un forte espaldarazo para o cumprimento do plan de negocio de Greenalia, xa que a empresa conta cun pipeline de proxectos en construción e en avanzado estado de tramitación de aproximadamente 2,5GW, repartidos en tres tecnoloxías: eólica onshore, fotovoltaica e baterías”, di a compañía. Non deixa de ser paradóxico dito espaldarazo nunha normativa impulsada por Trump, quen mostrou en reiteradas ocasións a súa animosidade cara ao proceso de descarbonización e o boom das renovables.

Aposta polas baterías en España

En canto a España, o decreto anti-apagóns estableceu unha serie de medidas para favorecer o almacenamento, en xeral, e as baterías en particular. Entre estas medidas estaría a declaración de utilidade pública das instalacións de almacenamento e das súas infraestruturas de evacuación; a non consideración de consumidores daquelas instalacións de xeración hibridadas con almacenamento que poidan consumir enerxía da rede; ou a exención da avaliación ambiental cando a instalación de almacenamento se atope dentro da poligonal do proxecto de xeración que conte previamente con DIA favorable.

Ante a nova regulación, Greenalia xa está avanzando na tramitación para a implantación de baterías hibridadas cos proxectos fotovoltaicos que a empresa ten en construción na SET de Guadame (Jaén), e que suman 310MW. “A implantación das ditas baterías suporá unha rendibilidade adicional para o conxunto dos proxectos”, sinala.