H&M ficha ao director global de Datos e Análise de Inditex
Diego Teijeiro Ruiz, que se incorpora a H&M tras máis de vinte anos en Inditex, era desde 2018 director global de Datos e Análise do xigante téxtil galego.
Diego Teijeiro Ruiz, que se incorpora a H&M tras máis de vinte anos en Inditex, era desde 2018 director global de Datos e Análise da multinacional de Arteixo.
Comentarios
Fichaxe de relevo para H&M. Nada menos que o director global de Datos e Análise de Inditex. Diego Teijeiro Ruiz, que se incorpora a H&M tras máis de vinte anos en Arteixo, era desde 2018 director global de Datos e Análise do xigante téxtil galego. Como chief data officer (CDO), o director executivo de datos, Diego Teijeiro era o responsable de obter o máximo valor empresarial dos datos que manexa Inditex e o encargado de establecer estratexias e supervisar as funcións de xestión, gobernanza, análise e seguridade dos mesmos.
A incorporación de Teijeiro a H&M, adiantada por Modaes, supón un movemento clave no mapa dos xigantes do téxtil, pola importancia que cada vez máis ten a tecnoloxía na toma de decisións. Tamén polo volume de investimentos que acometen as compañías do sector neste ámbito.
Un posto clave
O grupo sueco incorpora a Teijeiro como novo chief information officer (CIO). O nomeamento farase efectivo o próximo 25 de maio. O directivo formará parte do comité executivo e reportará directamente a Daniel Ervér, conselleiro delegado de H&M.
Enxeñeiro de Telecomunicacións pola Universidade de Vigo, Teijeiro comezou a súa andaina profesional en 2003 en Deloitte, para pasar un ano despois a ocupar postos de responsabilidade dentro do departamento de ciberseguridade de Mapfre. En 2007 incorpórase como consultor de ciberseguridade a Inditex, grupo no que escalou posicións ata converterse en 2018 en director global de Datos e Análise.
