Luz verde do Goberno a Tasga para que constrúa en 2028 a súa central reversible en Meirama

Respaldo do Ministerio para a Transición Ecolóxica e o Reto Demográfico (Miteco) a Tasga. O departamento que lidera Sara Aagesen adxudicou de forma definitiva á súa filial Coventina Renovables o concurso público para poñer en marcha unha central hidroeléctrica de bombeo en Meirama, no concello coruñés de Cerceda.

En concreto, adxudicouse á empresa o concurso de transición xusta de Meirama para conectar unha central hidroeléctrica reversible. O proxecto está ligado á creación de arredor de 180 empregos, así como á citada inversión, mediante a operación e mantemento da central hidroeléctrica reversible e o impulso a proxectos empresariais e actuacións de conservación e mellora ambiental no contorno do lago de As Encrobas.

Está previsto que as obras arranquen a finais de 2028 e que supoñan unha inversión superior aos 400 millóns de euros. Ademais, durante este proceso crearase un milleiro de empregos ao longo de dez anos.

Estas cifras foron reveladas durante unha comparecencia coa presenza do delegado do Goberno en Galicia, Pedro Blanco, e a directora do Instituto para a Transición Xusta, Judith Carreras, en relación ás novidades no concurso do nodo de Transición Xusta de Meirama. Judith Carreras explicou, sobre o contido da reunión na Delegación do Goberno, que o obxectivo foi informar da resolución definitiva do concurso articulado para Meirama, o cal foi, segundo as súas palabras, “competitivo e concurrido”, ao que se presentaron sete proxectos.

Sobre os criterios seguidos, insistiu en que foi asegurar unha xeración de enerxía renovable e a creación de emprego e destacou que Coventina Renovables depositou “as esixentes garantías, con 180 empregos asociados á parte de xeración”, engadiu.

O plan de Transición Xusta

Á súa vez, Blanco insistiu en que non hai Transición Xusta “sen un compromiso firme co territorio” e incidiu en que a estratexia é que o proceso de descarbonización “non deixe a ninguén atrás, a ningún municipio, a ningunha empresa ou traballador”.

“O que estamos a facer é atraer novos proxectos e investimentos para protexer aos 19 concellos galegos que forman parte das zonas de Transición Xusta de Meirama e As Pontes tras o peche das centrais térmicas”, destacou. “183 millóns de euros que permitiron crear máis de 400 empregos”, apostilou en relación á inversión realizada.

O representante de Coventina Renovables, Jesús Berzosa, incidiu, mentres que a súa prioridade foi “o emprego local e o compromiso de transmitir ás empresas que colaboren con nós esta esixencia”, sinalou. Por iso, dixo que plantexarán un programa de apoio á formación de traballadores.

Pola súa parte, o alcalde de Cerceda, José Manuel Rodríguez, incidiu na repercusión, a nivel de emprego e ingresos, do peche da central e destacou o anuncio nesta xornada polo que suporía un “drama social que non houbese proxectos enriba da mesa”. A isto sumou o aproveitamento do potencial turístico no lago de As Encrobas.