Plexus gaña 22 millóns e supera en beneficios a Altia, que lidera as tecnolóxicas galegas por ingresos

A pasada semana, Adif puxo en servizo o novo vestíbulo de 18.000 metros cadrados da estación de Chamartín-Clara Campoamor, sometida a unha profunda reforma encargada a ACS, San José, Comsa e Azvi por 560 millóns. A renovación e ampliación do principal nodo da alta velocidade española contou coa participación de Plexus, que se encargou do subministro e instalación dos sistemas de información en tempo real ao viaxeiro.

O papel da tecnolóxica galega na dixitalización de infraestruturas críticas non é unha casualidade para un grupo que marcou unha senda continuada de crecemento nos últimos anos, consolidándose como gran contratista de administracións públicas e socio tecnolóxico de bancos e multinacionais como Huawei. Traducido a cifras, a compañía que dirixe Antonio Agrasar pechou o 2025 cunha cifra de negocio de 283,4 millóns de euros, un 19,3% máis, o que posiciona Plexus como a segunda maior consultora tecnolóxica galega por volume de ingresos, quedando por detrás dos 315,3 millóns que facturou Altia.

Posto en perspectiva, o avance da tecnolóxica ralentizouse respecto a anos anteriores, cando conseguiu incrementar os seus ingresos nun 28,1% en 2024 e un 48% en 2023. Aínda así, a progresión é extraordinaria, pois factura máis do dobre que en 2022 e un 258,7% máis que en 2020. Como sucede co grupo de Tino Fernández, os de Antonio Agrasar tamén se apoiaron na adquisición de compañías, pois recentemente integraron a portuguesa Bi4ALL e Olocip, a empresa do exfutbolista Esteban Granero.

Con máis de 4.100 traballadores, Plexus obtén o groso dos seus ingresos nos países da UE, que representan 271 millóns da cifra de negocio, fronte aos 12,2 millóns facturados máis aló en territorios extracomunitarios. Por sectores, a banca e as administracións públicas seguen tendo o peso máis relevante, aínda que no mix están a gañar forza a área sanitaria ou o turismo. Participada por Portobello, a compañía xerou o ano pasado o 18% dos seus ingresos nos contratos coa industria e o retail.

Máis de 22 millóns de beneficio

Segundo o Estado de Información Non Financeira que fixo público Plexus, o grupo acadou uns beneficios de 22,2 millóns o ano pasado, un salto de case o 27% respecto aos 17,5 millóns de 2024. Neste ámbito si que supera a Altia, que obtivo unhas ganancias de 21,1 millóns en 2025. Foi clave neste avance a contribución da nova adquisición portuguesa, Bi4ALL, cunha achega de 3,34 millóns.

Máis aló desta sociedade, as filiais internacionais amosaron resultados dispares, aínda que case todas melloraron o seu desempeño respecto ao ano anterior. Pecharon con perdas Digitalwks (Portugal), Plextech Marroc (Marrocos) e Plexus Brasil. Foron achegas negativas de baixo impacto, nada máis grave que o resultado negativo de 95.000 euros da filial lusa. Pola contra, a sociedade inglesa Plexus Tech LTD achegou ganancias de 169.000 euros; a mexicana Plexus Latam, de 138.000 euros; a alemá Plexus Tech Gmbh, de 41.500 euros; e a polaca Plexus Tech S.P. Zoo, de 47.000 euros.

Un pólo tecnolóxico en Portugal

O CEO do grupo, Antonio Agrasar, vinculou o crecemento de Plexus á “evolución constante da compañía nos últimos anos dentro dun sector tan competitivo e de cambios continuos”. No texto que preside o documento, o fundador engade que se foron “adaptando ás diferentes necesidades e demandas do mercado aplicando unha sinxela fórmula pero eficiente e que é o leitmotiv de Plexus desde a súa creación: moito traballo, desenvolvemento de produtos, reinversión de beneficios, alianzas estratéxicas e formación continuada.

O primeiro executivo reitera a aposta por “crear un gran pólo tecnolóxico en Portugal”, ao que vincula a adquisición de Bi4ALL, que suma 370 profesionais aos que xa tiñan nas súas oficinas de Porto e Lisboa desde 2024. “A estratexia desta integración radica en acadar un crecemento de alto valor engadido co expertise e coñecemento dos máis de 20 anos de Bi4ALL en tecnoloxías de IA e Data que reforzará a nosa estrutura nestas áreas”, afirma. Curiosamente, a gran adquisición de Altia tamén foi en Portugal, coa compra de Noesis en 2019.