Monbus gaña contratos do bus escolar valorados en máis de 100 millóns en plena investigación de Competencia

Monbus volveu ser profeta na súa terra e levou un bo anaco das liñas de transporte escolar, un dos dous grandes contratos de mobilidade que licita a Xunta xunto coas liñas regulares de transporte de viaxeiros por estrada. O grupo de Raúl López adxudicouse 24 lotes dos 66 que repartiu a Consellería de Presidencia, Xustiza e Deportes (67 se se conta un que quedou deserto), aínda que non de xeito directo, senón a través de UTEs. Algunhas destas alianzas están formadas íntegramente por filiais da compañía, como a que se adxudicou o lote 12 por 1,5 millóns para prestar servizo en catro centros educativos da área de Compostela; mentres que noutras, Monbus comparte equipo con múltiples empresas, como no lote 11 para centros de Santiago no que se reparte os 1,37 millóns do contrato con Grabanxa e Mougán.

Con estes matices, as adxudicacións ás alianzas do rei galego dos autocares alcanzan os 32 millóns, repartidos neses 24 lotes. Tendo en conta a posibilidade de prórroga durante tres anos máis aos dous previstos, a valoración dos contratos en mans das UTEs de Monbus supera os 100 millóns. A mesa organizada pola Consellería que dirixe Diego Calvo resolveu a adxudicación das liñas o pasado oito de xuño e agora está pendente a entrega de documentación para a formalización dos contratos.

A valoración inicial da licitación para cubrir 1.500 rutas de transporte escolar alcanzaba, contabilizando as posibles prórrogas, un orzamento máximo de 257 millóns. En base a isto, as UTEs de Monbus teríanse feito cun 38% do concurso. Os contratos máis voluminosos destas alianzas corresponden ao lote 13, en Ames, adxudicado por 2,8 millóns a filiais de Monbus e Autocares Rías Baixas; o lote 34, en Santiago e área metropolitana, adxudicado por 2,6 millóns íntegramente ao grupo de Raúl López; e os lotes 33 e 67, un en Santiago e outro en Vigo, ambos adxudicados por 1,7 millóns.