O Congreso aproba o plan do BNG, co voto do PP, para que a Xunta teña presenza no consello de Navantia.
Os votos do PP, ERC e Bildu na Comisión de Industria do Congreso aprobaron unha iniciativa do BNG para que o máximo órgano de dirección dos estaleiros públicos teña un membro do Goberno galego.
Montaxe co presidente de Navantia, Ricardo Domínguez, sobre unha imaxe de arquivo do estaleiro de Navantia en Ferrol, na botadura dunha das fragatas F-11. Fotos: Europa Press
Comentarios
A maioría que conforman PP, ERC e EH Bildu na Comisión de Industria e Turismo do Congreso aprobou este martes unha iniciativa do BNG que, entre outras cousas, pide ao Goberno central que favoreza a entrada da Xunta de Galicia no consello de administración de Navantia.
Votos en contra de Vox e PSOE
A iniciativa, que foi votada punto por punto, conseguiu a abstención de Sumar e PNV, mentres que Vox e PSOE votaron en contra do epígrafe que falaba de que a Xunta de Galicia participase no consello de administración de Navantia.
O BNG tamén logrou o apoio do Congreso para reclamar ao Goberno a recuperación da actividade de construción naval civil, así como adxudicar ao centro de Ferrol as construcións de buques de porte medio e grande, “como viña sendo norma historicamente”.
Do mesmo xeito, o texto propón introducir ao centro de Ferrol “nos segmentos con maior carga tecnolóxica das actividades relacionadas coas enerxías renovables e a descarbonización da mobilidade marítima, concretamente a fábrica de turbinas”.
Novo dique
Outro dos puntos da iniciativa fala de crear novas infraestruturas, como un dique para nova construción e outro para reparacións de maiores dimensións que o actual dique 3, así como mellorar e aumentar a capacidade dos sistemas de elevación de cargas ou a renovación da Kollmann de Turbinas.
Por último, o BNG quere descentralizar a política de compras e de subcontratación, mentres que foi rexeitado o punto para aplicar as medidas sociais pactadas para o persoal de Navantia ao persoal da industria auxiliar, sobre todo as relativas á xubilación e á formación.
