Navantia e Windar alcanzan os 1.000 millóns de negocio con Iberdrola como gran cliente.
A alianza finaliza a fabricación dos 45 monopilotes destinados ao parque eólico mariño 'East Anglia 3' de Iberdrola e supera os 1.000 millóns en contratos en dez anos.
Navantia Seanergies e Windar finalizan os 45 monopilotes para o parque ‘East Anglia 3’ de Iberdrola – NAVANTIA
Comentarios
En un contexto de rearme e de grandes contratos para o Ministerio de Defensa, Navantia mantén un fluxo estable de ingresos na súa división de eólica mariña, ligada á actividade no estaleiro de Fene. O grupo público acaba de finalizar a fabricación de 45 monopilotes destinados ao parque eólico mariño East Anglia 3 de Iberdrola, a compañía que con máis consistencia confiou en Navantia Seaenergies e Windar para o desenvolvemento da eólica offshore. De feito, este proxecto é o segundo pedido de monopilotes completado para o grupo de Ignacio Sánchez Galán pola alianza e o terceiro deste tipo de cimentación executado conxuntamente ata a data.
Navantia e Windar traballaron para Iberdrola no Reino Unido, Alemaña e Francia, no marco dunha colaboración estratéxica que xa supera os 1.000 millóns de euros en encargos durante os últimos dez anos. Parte da fabricación deste proxecto desenvolveuse en paralelo ao parque eólico mariño Windanker (350 MW), tamén da enerxética, en augas do mar Báltico e para o que ambas empresas fabricaron 21 monopilotes.
Fene, a fábrica da eólica mariña
A fabricación destas subestruturas levouse a cabo na fábrica de monopilotes que ambas compañías operan conxuntamente no estaleiro de Navantia en Fene (A Coruña). Cada un dos 45 monopilotes ten unhas dimensións máximas de 84 metros de lonxitude, 1.800 toneladas de peso e 10,6 metros de diámetro. Estas cimentacións están destinadas a integrarse no complexo East Anglia de Iberdrola en augas británicas. Navantia Seanergies xa construíu previamente unha subestación e, xunto a Windar, 42 cimentacións tipo jackets para o East Anglia 1. Cando entre en operación en 2026, o parque no que se instalarán os monopilotes contará cunha capacidade de xeración de 1.400 megavatios (MW), suficientes para abastecer de enerxía limpa a 1,3 millóns de fogares.
O director de Navantia Seanergies, Javier Herrador, mostrouse “orgulloso” de ver como se materializa esta colaboración con Iberdrola, que permite á compañía “contribuír á creación de enerxía limpa e, ao mesmo tempo, apoiar a industrialización e crear emprego e riqueza nun sector estratéxico para Europa”.
Pola súa parte, o presidente de Windar Renovables, Orlando Alonso, destacou “o extraordinario traballo que todas as persoas e compañías implicadas neste pedido realizaron para responder ás necesidades dun cliente de primeiro nivel como Iberdrola, que está situando a España á vangarda mundial das enerxías renovables”.
