Navantia prevé acadar os 1.500 traballadores en Belfast, case tantos como en Ferrol, grazas ao contrato da Royal Navy.
O estaleiro que montou o Titanic é o principal centro de fabricación para os tres buques de apoio loxístico da Armada británica, o contrato que provocou a adquisición de Harland & Wolf por parte de Navantia, que está a investir 115 millóns en ampliar as instalacións.
Traballador nas instalacións de Navantia UK en Belfast / Navantia
Comentarios
Navantia prevé acadar os 1.500 traballadores no seu estaleiro de Belfast, un dos centros que integrou coa adquisición de Harland & Wolff. O grupo público de construción naval concentra nestas instalacións a maior parte do contrato de 2.000 millóns para construír os tres buques de apoio loxístico para a Royal Navy, o denominado programa Fleet Solid Support. Foi precisamente a conveniencia de manter este encargo o que motivou á compañía que preside Ricardo Domínguez a mercar os estaleiros británicos que construíron o Titanic.
Segundo explicou Navantia UK nun comunicado, a empresa puxo en marcha unha campaña de contratación para cubrir 28 postos cualificados en Belfast, onde conta ademais con 120 traballadores en formación, dos que máis da metade, 66, incorporaranse á plantilla en setembro.
“O programa Fleet Solid Support está a traer de volta a construción naval a gran escala a Belfast e a crear unha oportunidade para que os traballadores locais axuden a construír buques de auténtica importancia nacional. Estes buques serán os máis grandes que se entregaron neste estaleiro nunha xeración, grazas a un investimento de 98,5 millóns de libras esterlinas en instalacións, equipos e tecnoloxía modernos. Pero as nosas ambicións van moito máis alá do programa actual. Estamos a investir nas nosas instalacións, ampliando a nosa plantilla e desenvolvendo as habilidades necesarias para asegurar futuros proxectos, con plans para expandir o equipo de Belfast a 1.500 persoas nos próximos anos”, dixo Carlos López Carregado, Xerente Xeral de Harland & Wolff.
Os 1.500 traballadores converterían a Belfast no segundo estaleiro de Navantia con máis plantilla, só por detrás de Ferrol, que desenvolve o programa de fragatas da Armada española. A peche de 2025, a antiga Bazán tiña 1.725 operarios; San Fernando, 1.130; Cartagena, 1.082; Porto Real, 497; Cádiz, 175; e Fene, 174. Cabe matizar que os datos son cambiantes en función da carga de traballo e que non contabilizan a industria auxiliar, que no caso de Ferrol supón miles de empregos.
As inversións en Harland & Wolff
Máis aló do contrato para a flota auxiliar da Royal Navy, Navantia está a desenvolver unha forte inversión en Belfast destinada a posicionar o estaleiro “nun dos centros líderes de Europa na construción naval avanzada”. Os fondos comprometidos ascenden a 98,5 millóns de libras, uns 115 millóns de euros ao cambio, e permitirán modernizar, dixitalizar e ampliar o estaleiro de cara ao futuro que vai máis alá dese contrato e que coincide cun forte programa de investimento en defensa do Goberno británico para o rearme.
Con este obxectivo, Belfast equiparase cunha nova liña de paneis mecanizada, equipos de corte robóticos e unha nave de fabricación ampliada, segundo informou Navantia UK.
