Nestlé elevou vendas e gañou 92 millóns en España antes de propoñer o ERE para 300 traballadores
O grupo que preside Pablo Isla recortou os beneficios da súa filial española un 14% respecto ao ano anterior; a pesar do retroceso, os beneficios resistiron mellor que no conxunto do grupo, que anotou unha caída do 17%.
Pablo Isla, presidente de Nestlé, durante a xunta de accionistas do grupo este ano / Nestlé
Comentarios
A filial española de Nestlé avanza cara os 3.000 millóns de ingresos ao mesmo tempo que o grupo suízo negocia un recorte do 7% do cadro de persoal en España, unha das medidas de axuste impulsadas polo tándem formado por Pablo Isla e Phillip Navratil para tentar ampliar a rendibilidade da compañía e facer fronte á marca branca, o incremento de custos e o cambio nos hábitos de consumo.
Nestlé España, que controla as dez plantas da multinacional no país, pechou o exercicio de 2025 con uns ingresos de 2.888 millóns, o que supón un incremento do 12% respecto ao ano anterior, segundo as contas depositadas no Rexistro Mercantil. Os beneficios seguiron a tendencia inversa, situándose nos 91,7 millóns, un 14,3% menos. O resultado de explotación da empresa con sede en Esplugues de Llobregat (Barcelona) foi de 140 millóns, fronte aos 161 millóns de 2024.
Postos no contexto do grupo, os números da filial española amosan un comportamento positivo. O retroceso do 14% nos beneficios é inferior ao experimentado pola multinacional no seu conxunto, pois o resultado reduciuse un 17%. O mesmo sucede co volume de negocio, xa que a compañía suíza rematou o pasado exercicio cunha caída do 2%, fronte ao crecemento de Nestlé España. Ambas magnitudes viron afectadas polos tipos de cambio, pola depreciación dalgunhas divisas fronte ao franco suízo. As vendas no mercado europeo aumentaron un 3,5%, menos que as da filial española.
A pesar deste desempeño, Nestlé plantexou un recorte laboral máis duro en España que noutros territorios como Francia, Alemaña ou Italia. E iso que na comparativa territorial tamén sae gañando o mercado español. As vendas subiron un 5%, ata os 1.609 millóns, mentres en Francia ou Alemaña baixaban. En territorio galo pasaron de 3.437 millóns de francos suízos a 3.398 e en chan alemán diminuíron de 2.008 a 1.921 millóns de francos suízos, segundo a memoria anual do grupo.
Nestlé, Pontecesures e o leite condensado
Nestlé España controla dez plantas situadas en La Penilla (Cantabria), Girona, Miajadas (Cáceres), Pontecesures (Pontevedra), Xixón, Sebares (Asturias), Viladrau (Girona), Herrera del Duque (Badaxoz) e Reus, cuxa actividade se destina tanto ao mercado estatal como á exportación, sobre todo a Europa. Precisamente, o pasado fin de semana unha multitude, arredor de 1.500 persoas, manifestábase en Pontecesures contra o recorte de 17 empregos na fábrica, un 14% do cadro de persoal fronte ao 7% de media no conxunto do Estado. O conselleiro de Emprego da Xunta, José González, dixo este mércores que o axuste do grupo suízo é “difícil de entender”.
A única planta de Nestlé en Galicia é unha das máis veteranas da compañía en España. Inaugurouse en 1939, cando sacou ao mercado o seu primeiro bote de leite condensado, e ten a súa orixe en Ilepsa (Industria Lechera Peninsular, S.A.), empresa propiedade de Nestlé que se fundou o 1 de febreiro de 1938. A fábrica de Pontecesures converteuse en 1983 na única da división española dedicada á fabricación de leite condensado. Desde 2012 tamén é a única de Nestlé Europa, Oriente Medio e Norte de África que se dedica a este produto.
Ningunha desas credenciais evitou que a compañía plantexase un ERE que parece intentar abaratar custos que non se incrementaron pola vía do persoal, senón pola dos aprovisionamentos. Segundo as contas de Nestlé España, o pasado exercicio o gasto en aprovisionamentos aumentou nun 18%, ata os 1.970 millóns; mentres que os gastos de persoal fixérono en só un 2,7%.
Case a metade da produción no exterior
Nestlé España, con 2.000 millóns en activos, produce nas súas 10 fábricas café, chocolate, cacao, leite en po, auga embotellada, pratos preparados ou comida para mascotas, entre outros produtos. A maior parte, un 55%, destínase ao mercado español e o resto exportase. Segundo as contas da filial, o mercado europeo xerou 828 millóns en ingresos o ano pasado, aos que hai que sumar exportacións a outros territorios por valor de 448 millóns.
O grupo opera con marcas como Nestlé, Bonka, Viladrau, Nescafé, Solis, Ideal, Buitoni, Nespresso, Kit-Kat, Crunch ou Perrier, entre outras. Ademais, mantén unha alianza con a multinacional francesa Lactalis, o grupo que máis leite recolle en España, para a comercialización de iogures, con marcas como La Lechera.
