Nogar supera os 50 millóns de investimento en Punta Langosteira tras a nova ampliación da súa filial Galigrain

Luz verde da Autoridade Portuaria da Coruña á ampliación das instalacións de Galigrain. O consello de administración do ente que preside Martín Fernández Prado aprobou este venres este proxecto que contempla a construción dun edificio de oficinas e outras instalacións complementarias.

Con este movemento, a empresa pertencente ao Grupo Nogar incrementará a superficie da súa concesión principal na dársena en 8.825 metros cadrados, polo que superará os 94.000 en total.

Neste sentido, Galigrain xestiona dúas concesións no porto exterior. A principal que agora se amplía, dedicada fundamentalmente a produtos agroalimentarios, e outra destinada ao tráfico de aceites e melazas. “Esta empresa galega supera os 50 millóns de euros de investimento propio en Punta Langosteira“, detalla.

En paralelo, o consello de administración da Autoridade Portuaria da Coruña tamén aprobou unha modificación na concesión de Corunna Cruise Terminal, para instalar un caixeiro automático que dará servizo aos pasaxeiros e tripulantes dos cruceiros. Ademais, deu luz verde a unha pequena ampliación da concesión de Terminales Marítimos de Galicia no peirao do Centenario Oeste, co obxecto de instalar un peche desmontable que mellorará as condicións de seguridade e operatividade do recinto.