Norvento, Naturgy, Taiga Mistral… Galicia rexistra un auxe de solicitudes para proxectos de almacenamento eléctrico.
A consellería de Economía e Industria conta con 30 iniciativas en tramitación, dúas autorizadas (en Vigo e Malpica) e unha en funcionamento (en Sanxenxo).
Proxecto de almacenamento enerxético independente ou ‘stand-alone’ – MITECO – Arquivo
Comentarios
Aluvión de peticións para implantar instalacións de almacenamento eléctrico. Segundo datos da consellería de Economía e Industria, na actualidade contan xa con 30 iniciativas en tramitación dúas autorizadas (en Vigo e Malpica) e unha en funcionamento (en Sanxenxo).
O director xeral de Planificación Enerxética e Minas, Pablo Fernández Vila, sinalou a Europa Press que hai “moitísimo interese” por parte do sector neste tipo de instalacións, xa que os datos de solicitudes “se multiplican por tres e por catro” na fase de avais, anterior á do inicio da tramitación.
O momento no que os proxectos comezan a tramitarse implica que contan con permiso de acceso e conexión á rede. Son iniciativas cun impacto visual “moi pequeno” e ás que por tanto soen aplicarse procedementos de avaliación simplificada, segundo Fernández Vila, que apunta que as que superan os 50 megavatios son tramitados polo Goberno central.
Xunto ás convocatorias de axudas para apoiar a financiación destas instalacións, o director xeral xustifica o interese no almacenamento eléctrico en dúas vertentes: por un lado, o punto de vista técnico e por outro, o económico.
Así, achegar “robustez e resiliencia á rede” é o principal motivo polo que as administracións impulsan estes proxectos. De feito, alí sitúa a Xunta a súa “aposta prioritaria” polo almacenamento.
Mais, ademais, os plans de negocio emerxen como a outra causa principal do auxe destas instalacións: o almacenamento permite desestacionalizar a venda de enerxía, de modo que as eléctricas poden ‘gardar’ en períodos de baixos prezos e inxectar a enerxía cando é maior o custo, obtendo unha maior rendibilidade.
Ubicación dos proxectos
Catro dos proxectos para almacenar enerxía que tramita a Xunta de Galicia sitúanse en Ourense, tres en Vigo, outros tres en O Porriño e outros tantos en Santiago de Compostela.
A continuación figuran municipios como A Coruña, Sada, Oleiros, Chantada, Rubiá, e Carral-Cerdeda, todos eles con dúas instalacións de almacenamento en tramitación.
Cambados, Ordes, Rois-Lousame, Beariz, Cerceda e Abadín son as outras localidades nas que se tramita a instalación dun proxecto de almacenamento.
Salvo dous (vinculados a parques eólicos en Malpica, xa autorizado; e Abadín, en tramitación), todos son proxectos de almacenamento en baterías na modalidade ‘stand-alone’, aquelas que operan de forma independente, sen estar integradas a unha planta de xeración de enerxía renovable.
Mentres, a aposta da chinesa Sungrow por Galicia converteu á comunidade en “pioneira” neste tipo de sistemas coas baterías ‘stand-alone’ de Sanxenxo (Pontevedra). Situadas no polígono de Nantes, as instalacións do proxecto Bess Sanxenxo desenvólveas Soner Sorolla, filial da chinesa Sungrow en España, e entraron en servizo o pasado verán.
O outro tipo de almacenamento é o bombeo reversible, ámbito no que a Xunta deu luz verde ambiental a pasada primavera á investigación xeolóxica de Iberdrola para implantar unha megacentral hidroeléctrica en Vilariño de Conso (Ourense). Esta central de acumulación por bombeo preséntase como a maior de Europa.
Promotores
Entre os promotores das iniciativas que tramita o Goberno galego figuran nomes como Naturgy Renovables (o proxecto con autorización en Vigo), Norvento (o de hibridación en Abadín), Taiga Mistral (preto de Marineda en A Coruña, os dous de Oleiros e tres de Ourense), GR Cormoran Renovables (Belesar I e II en Chantada) e Macrina Solar (‘Cayetano’ I, II e III en Santiago).
Por parte do Executivo central, o Ministerio para a Transición Ecolóxica e o Reto Demográfico deu a coñecer a finais de ano o resultado definitivo da convocatoria de axudas a proxectos de investimento en almacenamento, con 11 proxectos seleccionados en Galicia aos que asignará case 97,2 millóns de euros do fondo europeo de desenvolvemento rexional: 10,37 millóns para ‘stand-alone’, 47,58 millóns para hibridado e 39,24 millóns ao bombeo.
