Novo ‘xefe’ nos comedores de Inditex: Sodexo cambia de CEO

A multinacional francesa Sodexo, dedicada á restauración e servizos, anunciou o nomeamento de Caroline Soladie como nova CEO da compañía en España. A directiva conta con máis de 25 anos de experiencia no grupo, a última etapa como directora xeral en Europa Continental. Soladie toma as rendas do negocio en España uns meses despois de que a compañía situase a Thierry Delaporte como conselleiro delegado a nivel global, no marco dunha reorganización interna para separar o posto de CEO da presidencia de Sophie Bellon.

Ao peche de 2024, Sodexo contaba con 6.500 traballadores en territorio español e máis de 400 clientes, entre colexios, universidades, hospitais e empresas, segundo os datos recollidos na súa memoria de sustentabilidade. Entre estas últimas está Inditex, para a que xestiona o servizo de comedor en diversos centros, como en Arteixo ou en Narón. Soladie substituirá no cargo a Carina Cabezas.

“Síntome moi feliz de iniciar unha nova etapa como CEO de Sodexo en España. Asumo esta oportunidade con gran entusiasmo e responsabilidade, co firme propósito de impulsar o crecemento sostible, a excelencia no servizo e o compromiso cos nosos clientes e equipos”, dixo a executiva,

Nun comunicado, o grupo destaca da nova conselleira delegada o seu “liderado inclusivo, a súa visión estratéxica centrada no cliente e a súa capacidade para mobilizar os equipos”.