O Goberno responde ‘in extremis’ a Bruxelas, pero non aclara os seus pasos ante ultimato pola AP-9

O Goberno chega in extremis á súa cita con Bruxelas en relación á prórroga da AP-9. O Executivo central confirmou este mércores que respondeu xusto a tempo á Comisión Europea, que considera que vulnerou as regras da Unión Europea en materia de contratación pública.

O Executivo central moveu ficha despois de que a Comisión Europea lle reclamase que enmendase as irregularidades polas que foron prorrogadas as concesións dos peaxes nas autoestradas AP-66 e AP-9 e que, aos ollos de Bruxelas, vulneran as regras da Unión Europea en materia de contratación pública e de concesión de autoestradas. Un asunto que, de non terse resolto no prazo de dous meses (que expira este mércores), os servizos comunitarios poderían elevar ao TJUE.

O Executivo central enviou esta mañá unha resposta “ampla” do último ditame de Bruxelas, “na que España achega as aclaracións precisas e a información xustificada a ter en conta á hora de que se poida realizar unha valoración sempre na defensa dos intereses xerais de España”. Con todo, o Executivo optou por non pronunciarse nin por rescatar nin por abordar un novo plan de bonificacións para convertela en gratuíta.

O Goberno carga contra Aznar

“Esta fase non supón aínda o final do procedemento. Analizaremos os seguintes pasos da Comisión Europea con este recurso para, chegado o caso, esgotar as posibles opcións de resposta”, engaden desde o Ministerio en unhas escuetas declaracións enviadas aos medios de comunicación, onde non se recolle a resposta enviada a Bruxelas.

Ademais, o Goberno aproveitou para volver a cargar contra o PP, insistindo en que a prórroga da concesión da autoestrada ata 20248 foi aprobada no ano 2000 polo Goberno de José María Aznar. “Corréspondelle ao PP explicar os motivos polos que tomou unha decisión que este Goberno non tería adoptado e que claramente é prexudicial para os dereitos dos cidadáns”, apuntan.

“Aínda que as políticas de mobilidade e reequilibrio territorial que actualmente defende este Goberno van na dirección contraria, desde o Ministerio colaborouse e respondeuse a todas as solicitudes realizadas pola Comisión Europea por responsabilidade e para velar polo interese común, como tamén fixemos nesta ocasión”, subliñaron desde o Executivo, destacando as bonificacións de peaxes postas en marcha.