Os transportistas galegos ven insuficientes as medidas anticrise do Goberno e ameazan cun parón

O paquete de medidas anticrise que o Consello de Ministros aprobou este venres non contenta aos transportistas galegos. Vieiros Unidade Galega de Transportistas trasladou nunha nota de prensa que as medidas incluídas son “decepcionantes e en certa medida prexudiciais”.

Desde a entidade móstranse “decepcionados” coas medidas incluídas no Decreto-Lei do Goberno para axudas ao sector ante a suba dos prezos do carburante pola guerra no Oriente Próximo e denuncian que favorecen máis aos vehículos particulares. Ao seu xuízo, as axudas favorecen máis aos vehículos particulares debido a que o Executivo priorizou “baixar considerablemente o prezo de venda ao público do combustible nas estacións de servizo”, mediante a redución do IVE do 21% ao 10% e a posterior baixada do Imposto de Hidrocarburos.

Segundo explican, “o IVE é un imposto neutro para as empresas transportistas”, polo que “non supón ningunha vantaxe máis aló de non ter que adiantalo a Facenda“. En relación co diésel profesional, denuncian que “a redución de 4,9 céntimos por litro no Imposto de Hidrocarburos derroga na práctica o marxe do gasóleo profesional (de momento ata o 30 de xuño)”.

En paralelo lamentaron que o Goberno non accedese á súa petición dun incremento de 10 puntos porcentuais no índice da cláusula de indexación do combustible, que tería afectado a todas as tipoloxías de vehículos.

“Desvirtuada para as empresas de transporte”

A asociación sinalou que a redución do PVP do diésel e a eliminación do marxe do gasóleo profesional provocan que a cláusula de indexación do diésel quede “totalmente desvirtuada para as empresas de transporte”. Neste sentido, engaden que as compañías “terán que absterse de empregar esta cláusula para repercutir os aumentos do prezo do combustible nos seus clientes”.

En canto ás axudas, indicaron que os transportistas con vehículos de máis de 7,5 toneladas recibirán “unha bonificación de 20 céntimos por litro no Imposto de Hidrocarburos ata o 30 de xuño”, mentres que os de menor tonelaxe percibirán unha axuda directa (665 euros para vehículos entre 3,5 e 7,5 toneladas e 450 euros para os máis lixeiros).

Non obstante, enfatizaron que estas contías “son inferiores ás habilitadas durante a guerra de Ucraína de 2022/23, cando o prezo do diésel non estaba tan alto como na actualidade”. Ademais, sinalaron que se inclúe a condición de “non poder despedir a ningún traballador entre o 22 de marzo e o 30 de xuño se se queren manter as axudas”.

Por todo iso, reiteraron a súa advertencia de que se o Goberno “non rectifica de modo inmediato antes de que acabe marzo”, o sector vai iniciar unha paralización da actividade e comezar mobilizacións a nivel estatal.