Pharma Mar renova a Sandra Ortega e ficha a Juan Manuel Vieites, presidente da patronal galega, para o seu consello
A biotecnolóxica incorpora dous novos conselleiros na súa próxima xunta de accionistas, na que renovarán tres dos catro grandes accionistas: o presidente José María Fernández de Sousa; o presidente de Zendal, Pedro Fernández Puentes; e a primoxénita de Amancio Ortega.
Montaxe con imaxes de Sandra Ortega e Juan Manuel Vieites coa sede de PharmaMar de fondo
Comentarios
Pharma Mar levará á súa xunta de accionistas o nomeamento de dous novos conselleiros. Incorporaranse ao organismo de administración Juan Manuel Vieites, químico e presidente da Confederación de Empresarios de Galicia, a terra onde naceu a antiga Zeltia, aínda que acabou vendendo todos os seus activos situados en territorio galego cando consumou o seu xiro cara á oncología. Vieites é doutor en Químicas pola Universidade de Santiago de Compostela e foi durante 31 anos secretario xeral da patronal do sector da conserva Anfaco-Cecopesca, cargo que deixou para liderar a patronal galega cando atravesaba unha profunda crise interna.
Ademais de Vieites, incorporaráse tamén ao consello de Pharma Mar María Victoria Mateos Manteca, doutora en Medicina e Cirurxía e investigadora clínica en hematoloxía e hemoterapia no Hospital Universitario de Salamanca, ademais de presidir a Sociedade Española de Hematoloxía e Hemoterapia. Ambos terán o cargo de conselleiros independentes.
Renovación dos grandes accionistas
A xunta de accionistas que se celebrará o 30 de xuño servirá tamén para renovar os cargos no consello de grandes accionistas do grupo. Entre eles estará Sandra Ortega, a filla do fundador de Inditex e de Rosalía Mera, propietaria dun 5% da biotecnolóxica. Pedro Fernández Puentes, presidente da farmacéutica galega Zendal e cuarto maior accionista de Pharma Mar, tamén renovará o seu posto de conselleiro por catro anos, ao igual que José María Fernández de Sousa. O presidente da compañía é o principal accionista, cun 11,5% dos títulos, mentres que a súa esposa, Montserrat Andrade, controla outro 5,3% do capital.
O oncólogo Emiliano Calvo Aller, director de Investigación Clínica da Unidade de Ensaios Clínicos START Madrid-CIOCC, tamén renovará por catro anos máis no consello na próxima xunta. É membro do patronato da Fundación Pharma Mar, impulsada polo grupo para promover a investigación científica e preservar a biodiversidade mariña.
