Pharma Mar triplica beneficios grazas ao novo salto de Zepzelca en EE UU

Pharma Mar pisa o acelerador. A compañía que preside José María Fernández de Sousa pechou o seu exercicio fiscal 2025 cun beneficio neto por valor de 75 millóns, segundo a documentación que remitíu este venres á Comisión Nacional do Mercado de Valores (CNMV).

Os beneficios da empresa de orixe galega disparáronse un 187% respecto ao ano anterior grazas ao novo salto nos seus ingresos. Non en balde, a súa cifra de negocios elevouse un 27%, ata acadar os 221,4 millóns de euros. Os ingresos recorrentes (aqueles resultantes de sumar as vendas netas máis os royalties recibidos dos seus socios) repuntaron un 12%, ata os 143,5 millóns de euros.

A expansión de Zepzelca

“As vendas netas de oncología pecharon o exercicio cun crecemento do 20%, alcanzando os 79,7 millóns de euros. Este crecemento vén impulsado polo aumento do 31% dos ingresos de Zepzelca (lurbinectedina) en Europa ata os 37,5 millóns de euros”, destaca a empresa, que recalca que 26,2 millóns procederon do programa de uso compasivo polo cal pode comercializar o fármaco a pesar de non estar aprobado aínda pola EMA mentres que os 11,3 millóns restantes correspóndense con vendas en Suíza.

“Pola súa parte, a venda de materia prima aos nosos socios, tanto de lurbinectedina como de Yondelis (trabectedina), creceu un 37% ata os 27,5 millóns de euros”, engade Pharma Mar, que subliña que “os ingresos por royalties de oncología rexistraron un aumento do 4% ata os 63,8 millóns de euros”.

Pero a estes ingresos súmanse outros 77,8 millóns de euros procedentes de acordos de licenza, que se elevaron un 67%. 42,5 millóns de euros correspóndense “ao fito da obtención do full approval de lurbinectedina por parte da FDA estadounidense”, destaca a empresa. Outros 21,3 millóns ao pago inicial (upfront) polo acordo de Zepzelca en Xapón e outros 8,6 millóns “ao pago dun fito comercial establecido no acordo de licenza de trabectedina [Yondelis] en Estados Unidos“.

Na súa presentación de resultados, Pharma Mar pon en valor a aprobación de Zepzelca “en combinación con atezolizumab (Tecentriq)” por parte da FDA “para ampliar o seu uso ao tratamento de primeira liña de mantemento en cancro de pulmón microcítico en estadio estendido. Con iso, os ingresos de lurbinectedina no cuarto trimestre en Estados Unidos foron de aproximadamente 90 millóns de dólares, converténdose así na maior venda trimestral desde o lanzamento de lurbinectedina en Estados Unidos e representando un crecemento interanual do 15% en comparación co cuarto trimestre de 2024″, precisa a compañía.

Este salto en materia de ingresos trasladouse á súa rendibilidade, xa que o resultado bruto de explotación (Ebitda) da farmacéutica ascendeu a 68,1 millóns de euros en 2025, máis de cinco veces máis que o rexistrado en 2024.

Pola súa parte, a inversión en I+D baixou de 103,5 a 95,2 millóns de euros no último ano mentres que a posición neta de caixa elevouse de 109,2 a 121,2 millóns de euros grazas a este impulso á súa conta de resultados.