Frente de Galicia, Asturias e Castela e León polo fin da concesión de Audasa coa AP-9
Representantes políticos e empresariais asinaron a Declaración de Compostela, coa que se insta á Unión Europea a unha resolución definitiva do procedemento aberto sobre as prórrogas das concesións da AP-9 e da AP-66, que están en mans do grupo Itínere.
Representantes dos gobernos de Galicia, Asturias e Castela e León, xunto coas patronais empresariais das tres comunidades, selan un fronte común para o fin das concesións da AP-9 e AP-66 / Xunta
Comentarios
Galicia, Asturias e Castela e León unen as súas forzas contra as concesións das autoestradas AP-9 e AP-66 (ambas pertencentes ao grupo Itínere). A conselleira de Vivenda e Planificación de Infraestruturas da Xunta, María Martínez Allegue; o conselleiro de Mobilidade, Medio Ambiente e Xestión de Emerxencias do Principado de Asturias, Alejandro Calvo; e a secretaria xeral de Mobilidade da Xunta de Castela e León, Natalia Flórez; rubricaron este mércores a denominada Declaración de Compostela, a través da cal reclaman á Unión Europea (UE) unha resolución definitiva do procedemento aberto sobre as prórrogas das concesións que obrigue ao Goberno central a poñerlles fin.
A Declaración de Compostela subliña a importancia estratéxica de ambas autoestradas para a mobilidade de persoas e mercadorías, a competitividade empresarial, a cohesión territorial e o desenvolvemento económico do noroeste. Ademais, destaca que o seu réxime concesional ten unha incidencia directa sobre millóns de persoas e miles de empresas.
O noroeste arma, deste xeito, un fronte común en defensa dos intereses económicos, sociais e territoriais compartidos. No acto que tivo lugar en Santiago de Compostela tamén interviron pola parte empresarial o presidente da Confederación de Empresarios de Galicia, Juan Manuel Vieites; a presidenta da Federación Asturiana de Empresarios, María Calvo; e o presidente da Federación Leonesa de Empresarios, Juan María Vallejo; así como o conselleiro de MundiNova e presidente de En Colectivo, Diego Maraña.
Un ano de cerco en Bruxelas
O acordo prodúcese cando está a piques de cumprirse un ano desde que a Comisión Europea (CE) concluíse no seu ditame motivado que as prórrogas das concesións da AP-9 e a AP-66 formalizadas no ano 2000 incumpriron a normativa comunitaria en materia de contratación pública e concesións. A apertura do correspondente procedemento de infracción contra o Reino de España comezou hai case cinco anos, a raíz dunha denuncia presentada por En Colectivo.
Neste contexto, o conselleiro asturiano de Mobilidade, Medio Ambiente e Xestión de Emerxencias, Alejandro Calvo, explicou que se necesita que o traballo deste ditame da Unión Europea siga avanzando, para o que as tres comunidades se dirixirán ao vicepresidente executivo da Comisión Europea (CE), Stéphane Séjourné, co obxectivo de que o asunto vaia ao colexio de comisarios e se converta non só nun ditame, senón nunha “ameaza importante de incumprimento e sancións ao Goberno de España, que obrigue ao seu cumprimento”. “É dicir, redobrar a presión para que o Goberno actúe”, sinalou.
Por outra banda, a conselleira de Vivenda e Planificación de Infraestruturas, María Martínez Allegue, explicou este mesmo venres que as tres comunidades remitirán unha carta ao vicepresidente executivo da CE coa solicitude de reunión. Segundo revelou, os recursos xudiciais presentados por cada comunidade seguen distintos cauces, lembrou que a Xunta soubo hai case un ano do ditame polos medios e que a día de hoxe descoñece o contido da resposta emitida polo Goberno, un feito ante o que acudiu aos tribunais.
“Queremos transparencia e toda a información”, dixo para asegurar que isto é “máis necesario que nunca” nun momento no que, segundo sostivo, “ameázase cunha transferencia” da AP-9 “imposta” desde Madrid e que non respecta “o texto aprobado por unanimidade no Parlamento galego“. A conselleira incidiu en que o Goberno debe rescatar a AP-9 e traspasar a súa titularidade a Galicia, pero que esta debe ser “unha transferencia financiada”.
Peaxes que “prexudican” a competitividade
Por outra banda, a secretaria xeral de Mobilidade de Castela e León, Natalia Flórez, puxo en valor a posición común das tres comunidades tanto a nivel institucional como empresarial para defender en Europa o fin das prórrogas concesionais, cuxos peaxes “prexudican a mobilidade, a cohesión e a competitividade”. “Pedimos que a Comisión Europea leve o procedemento ata as últimas consecuencias e reclamamos ao Goberno transparencia nun asunto que afecta a Castela e León“, afirmou.
A Declaración de Compostela formaliza, ademais, unha alianza estable entre as administracións públicas e o tecido produtivo de Asturias, Galicia e Castela e León para manter unha interlocución permanente coas institucións europeas e subliñar, de forma coordinada, a importancia económica, social e territorial desta cuestión para todo o noroeste.
O texto conclúe cun chamamento a que a resolución deste asunto contribúa a reforzar a confianza da cidadanía, as empresas e as institucións no Estado de dereito europeo e nos principios de transparencia, competencia, igualdade de trato e seguridade xurídica que sustentan o mercado único.
A voltas cos prazos
Por outra banda, no acto no que as patronais empresariais das tres comunidades incidíron nos prexuízos económicos que a existencia destes peaxes provoca nos territorios, o presidente de En Colectivo, Diego Maraña, explicou que se o Goberno non acata o ditame de forma voluntaria, a Comisión Europea debe iniciar o procedemento de execución do ditame no Tribunal de Xustiza da Unión Europea (TXUE), un feito que, segundo advertiu, “alongará os prazos”.
Por iso, dixo que esta Alianza do Noroeste aspira a “non dilatar máis o cumprimento da legalidade” e que o Goberno do Estado execute o ditame de xullo de 2025 e sobre o que, conforme sostivo, aínda non se sabe o que vai facer o Executivo estatal.
No acto e preguntada sobre se a Xunta ten o compromiso do líder do PP, Alberto Núñez Feijóo, para traspasar a AP-9 se hai cambio de Goberno, incidiu en que o Executivo galego esixe o rescate e a transferencia pero non a “trampa” que, na súa opinión, impulsa o PSOE e os seus socios.
Allegue criticou a negativa do Goberno a proceder ao rescate cando, segundo os traballos encargados pola Xunta, o seu custo é igual ao das bonificacións que aplica o Executivo estatal ata o final do período concesional no ano 48. Un diñeiro que, conforme advertiu, se incrementa cada ano polo “gran lucro cesante”. Por iso, insistiu en que a Xunta esixe o rescate e a transferencia financiada como aprobou o Parlamento de Galicia.
“Os intereses que estamos defendendo como Xunta serán defendidos do mesmo xeito ante o Goberno central, goberne quen goberne”, incidiu.
