Profand, gran provedora de Mercadona, compra o complexo industrial que explota ao lado do aeroporto de Zaragoza.
A primeira pesqueira galega por vendas adquire do Goberno de Aragón unha parcela de 100.000 metros cadrados na xigantesca Plataforma Loxística de Zaragoza, onde tamén se asenta Inditex.
Profand compra ao Goberno de Aragón as instalacións que xa explota en Zaragoza. Foto: Profand
Comentarios
Operación de altura de Profand, o primeiro grupo pesqueiro de Galicia. A compañía, unha das grandes provedoras de Mercadona, fixo co complexo industrial que explota desde hai anos na Plataforma Loxística de Zaragoza, unha parcela de preto de 100.000 metros cadrados próxima ao aeroporto da capital aragonesa e estratexicamente conectada por estrada e ferrocarril.
Profand desembarcou en Zaragoza en 2019 cando se fixo con Caladero, empresa de produción e distribución de peixe fresco. O vendedor foi precisamente Mercadona a quen pagou preto de 90 millóns de euros. O negocio pesqueiro operaba a instalación de centro loxístico aragonés en réxime de arrendamento.
Profand pasa de ser arrendataria a propietaria tras adxudicarse un proceso de licitación pública convocado polo Goberno de Aragón para facerse con este activo, en mans ata agora das entidades públicas Corporación Empresarial Pública de Aragón e Aragón Plataforma Loxística. O importe da operación, de momento, non foi publicitado.
Estratexia de crecemento
“A planta sitúase nunha parcela de cen mil metros cadrados, próxima ao Aeroporto de Zaragoza e estratexicamente conectada por estrada, ferrocarril e vía aérea coa Unión Europea. Esta ubicación reforza as capacidades loxísticas do grupo e a súa estratexia de crecemento sostible”, explica a compañía.
“Esta operación supón un fito estratéxico para o grupo, xa que nos permite consolidar a nosa presenza industrial nunha das principais plataformas loxísticas do país e reforzar a nosa capacidade de servizo a clientes nacionais e internacionais”, sinalan fontes da empresa. “A propiedade destas instalacións ofrécenos estabilidade a longo prazo e permitiranos impulsar novas investimentos orientadas á innovación, a eficiencia e a sostibilidade”, apunta.
