Reganosa recorta ingresos e beneficios pola baixa retribución do gas a pesar de aumentar a súa actividade en Mugardos

Reganosa pechou o seu último exercicio cun retroceso nos beneficios, que se situaron nos 9,1 millóns, un 27 % menos que os beneficios de 12,6 millóns de 2024. O grupo que controla Gadisa e ten como segundo accionista á Xunta reduciu tamén os seus ingresos a pesar de que a actividade na planta de Mugardos, así como a súa presenza internacional, foi maior que no ano anterior. A compañía, accionista tamén da terminal de El Musel en Asturias, alcanzou os 27.144 GWh en descarga de buques e os 24.965 GWh en regasificación, fronte aos 23.710 e 22.699 respectivamente do ano anterior. A división de servizos, aínda que non detalla os ingresos, estendeu a súa actividade a 18 países, fronte aos 15 do ano anterior, o que mostra tamén unha evolución positiva, xerando un beneficio de 3,2 millóns, fronte aos 3,1 millóns de 2024.

A pesares de todo iso, os ingresos, ao igual que os beneficios, foron á baixa. Situáronse nos 56,3 millóns, en comparación cos 60,8 millóns de 2024. O ebitda mantívose máis estable, con 21,5 millóns en 2025 e 22,1 millóns no exercicio precedente. Esta aparente contradición, segundo explican no grupo, non se debe a unha menor eficiencia senón ao propio modelo retributivo regulado do gas, que establece a Comisión Nacional dos Mercados e a Competencia e que recorta transferencias segundo os activos avanzan no seu ciclo de vida.

A retribución do gas

No informe anual do grupo, o presidente de Reganosa, Roberto Tojeiro, refírese a este escenario nun momento no que Competencia acaba de sacar a audiencia pública o marco retributivo para o período 2027-2032. “No ámbito do gas natural, os actuais marcos retributivos plantexan retos para a sustentabilidade económica de instalacións que, paradoxalmente, seguen sendo consideradas imprescindibles para a seguridade de subministración e a integración de renovables. Afrontamos este escenario con realismo e responsabilidade, convencidos de que os próximos deseños reguladores deberán equilibrar a seguridade de subministración, a independencia enerxética e a sustentabilidade económica, social e ambiental do noso modelo enerxético”, di o tamén presidente de Gadisa.

Fontes da regasificadora galega explican que o modelo que finaliza este 2026 supuxo unha “infrarretribución” do sistema de 53,3 millóns entre 2021 e 2024. Será en 2027 cando comezará a aplicarse ese novo marco retributivo que “virá a garantir a competitividade das redes gasistas e das regasificadoras ou que, pola contra, podería comprometer a sustentabilidade de plantas como a de Mugardos e, polo tanto, a seguridade do subministración enerxética”. “Unha instalación que é vital non só para o porto de Ferrol -supón o primeiro dos seus tráficos-, senón para o conxunto de Galicia, ao posibilitar a descarbonización da súa economía como respaldo das renovables e apuntalar a competitividade da industria”, recalcan na compañía.

Máis fondos propios e sen débeda

A rendibilidade sobre capital investido (ROE) situouse no 4,3 %, dous puntos porcentuais menos que un ano antes; e no 5,2 % sobre activos (ROA), 1,3 puntos menos. Reganosa tiña uns fondos propios de 220 millóns ao peche de exercicio e uns activos valorados en 175,6 millóns, un balance sólido se se ten en conta que carece de débeda financeira. As inversións do exercicio ascenderon a 9,3 millóns, algo inferiores ás de 2024 pero máis do triplo que en 2023. O grupo dá emprego a 185 persoas.

Na compañía, que acaba de adquirir as tres centrais hidroeléctricas de Saltos del Cinca en Aragón, explican que a incerteza respecto ao modelo retributivo “convive coas boas novas que o Grupo Reganosa está a colleitar no resto dos seus ámbitos de actuación”, como “que a división de servizos fora elixida por Squadron Energy –a empresa líder en enerxías renovables de Australia– para realizar a operación e mantemento da parte terrestre da terminal enerxética de Port Kembla, no estado australiano de Nova Gales do Sur”. Lembran, ademais, que está a promover proxectos de almacenamento enerxético, renovables, economía circular, hidróxeno verde, eficiencia enerxética e dixitalización, entre eles, a central de hidróxeno de As Pontes.

A nova retribución

Reganosa forma parte de Sedigas, a asociación que desde hai 50 anos integra ás empresas do sector gasista español. Esta organización fixo un pronunciamento oficial sobre a proposta de retribución para o próximo sexenio de Competencia. Sinala a entidade que valora a decisión da CNMC de preservar a arquitectura básica do modelo, o que “achega estabilidade e previsibilidade regulatoria, ao tempo que introduce sinais económicas orientadas á modernización do sistema”. Tamén destaca que “as propostas avanzan cara a un enfoque que recoñece ás infraestruturas gasistas como activos estratéxicos do sistema enerxético, esenciais para garantir a seguridade de subministración, a competitividade da economía e o avance ordenado cara á descarbonización”.

Con todo, ve necesario introducir “importantes axustes” que garantan un marco retributivo suficiente e razoable para o conxunto das actividades reguladas. “Aprecia que o recoñecemento de determinadas variables económicas relevantes, como a evolución dos custos por efectos da inflación no segundo período regulatorio, non se produce de xeito completo para o conxunto das actividades reguladas, o que aconsella unha revisión desde a perspectiva da consistencia e o equilibrio do modelo retributivo”, di a patronal, que recalca que “a reconfiguración do esquema de incentivos debe garantir unha transición ordenada e sen impactos asimétricos entre operadores con realidades comparables”.