Resonac logra 2,7 millóns en axudas para producir compoñentes de baterías na antiga planta de Alcoa

O Ministerio de Industria adxudicou de maneira provisional 27,3 millóns de euros en subvencións da cuarta convocatoria do Perte do Vehículo Eléctrico e Conectado na súa sección de baterías. Deste importe, case catro millóns caeron en Galicia. A axuda máis importante levaraa Resonac para o seu proxecto na antiga planta de Alcoa na Coruña. A compañía recibe 2,74 millóns para a “producción a gran escala de grafito sostible para ánodos de baterías de vehículos eléctricos”. Os fondos públicos cubren un 14% da inversión que prevé realizar o grupo xaponés, de 18,2 millóns, segundo consta na resolución provisional do Perte.

O proxecto de Resonac denomínase Ikigai, foi presentado o ano pasado e pretende levantar unha planta pioneira para o uso de grafito destinado a ánodos de baterías de coches eléctricos e de electrodos de grafito para fornos de produción de aceiro.

A resolución do programa de axudas tamén sorri a Vigo, concretamente, a Borgwarner, que recibe algo máis dun millón de euros para “novas liñas de produción enfocadas á fabricación de compoñentes esenciais para a xestión térmica de baterías“. A esta ampliación de negocio prevé destinar unha inversión total de 6,7 millóns.

O Ministerio aprobou tamén unha axuda de 6,1 millóns a Basquevolt no País Vasco; outra de 1,6 millóns a Gestamp Palencia; 4,9 millóns para Micro Electrochemical Technologies, en Castela-A Mancha; e, a máis elevada de todas, para Cummins New Power, tamén en Castela-A Mancha, por valor de 10,8 millóns.

Mobiliza 1.250 millóns en axudas

En un comunicado, o departamento de Jordi Hereu explica que o obxectivo deste Perte é incentivar a realización de plans de investimento dentro do campo da produción de baterías e compoñentes das mesmas, destinadas ao vehículo eléctrico e os seus compoñentes, así como para a produción ou recuperación das materias primas destinadas a estas.
 
A cuarta convocatoria do Perte VEC, dotada con 1.250 millóns de euros, está integramente xestionada por Sepides. A entidade contribuirá a aumentar a cifra de investimento total alcanzada polas tres convocatorias anteriores de baterías, que superaron os 900 millóns de euros.