O Supremo entra na guerra da AP-9 e pide o ditame de Bruxelas sobre a prórroga de Aznar

O Tribunal Supremo solicitou á Comisión Europea o ditame no que considera ilegal a prórroga da autoestrada galega AP-9 ata 2048, concedida polo Goberno de José María Aznar antes da privatización da vía. O Alto Tribunal quere analizar o documento para decidir se o Executivo central debe anular aquela ampliación do período concesional. A autoestrada está xestionada actualmente por Audasa, unha filial do grupo de infraestruturas Itínere, á súa vez, propiedade do fondo de pensións APG e de Swiss Life. Desde que Bruxelas considerou ilegal a prórroga, Itínere recalca que unha posible anulación da súa concesión debería levar aparellada unha cuantiosa indemnización ao grupo.

O Supremo, nun auto desvelado por Europa Press, explica que a Asociación Empresarial de Transporte de Mercadorías por Estrada de Galicia (Apetamcor) interpuxo recurso contra o acordo do Consello de Ministros adoptado a finais de 2025 polo que se inadmitiu a trámite a súa solicitude de revisión de oficio das prórrogas da concesión. Neste recurso, a asociación solicitaba unha copia do ditame motivado pola Comisión Europea no procedemento de infracción iniciado contra España precisamente por esa prórroga.

Aínda que o Supremo recoñece que os ditames da Comisión “non teñen o efecto xurídico directo de anular os actos obxecto do procedemento”, considera que “iso non implica que dito ditame non sexa relevante, podendo ser tomado en consideración como un elemento máis que sirva para apreciar se existiron infraccións das normas da Unión Europea que poden determinar a nulidade de pleno dereito das normas cuxa revisión de oficio se solicita”.

Cambio de idea

O pasado maio, o Supremo admitiu a negativa do Goberno a facilitar o ditame europeo co argumento de que non formaría parte do expediente de revisión propiamente dito, unha información que avanzou Praza. Non obstante, agora o Tribunal si acepta a vía empregada pola asociación para poder coñecer o contido dese documento.

“Agora ben, a apreciación de se concurren ou non as excepcións que determinarían a imposibilidade de remitir dito documento para incorporalo a este proceso, corresponde realizalas á Comisión Europea e non a este Tribunal, polo que proceder remitir oficio á Comisión Europea para que valore se procede ou non remitir o Ditame motivado que se solicita como medio de proba“, engade o Supremo no seu auto.

Transferencia da autoestrada

O procedemento xudicial e europeo sobre a legalidade da prórroga da concesión da AP-9 coincide cos movementos para transferir a autoestrada á Xunta, que pediu unha comisión bilateral sobre o traspaso. PSOE, Sumar e BNG acordaron unha proposta para que a vía, que transcorre entre Ferrol e Tui, pase ao Goberno galego, unha petición unánime do Parlamento autonómico. O problema está nas condicións. Alfonso Rueda e o seu equipo cren que as condicións fixadas na proposta pactada polos partidos poden acarrear penalidades económicas para a Xunta, que chegou a cifrar en 4.000 millóns. Un dos riscos que esgrimiu en seu momento o Executivo autonómico foi, precisamente, a posible indemnización a Audasa por unha eventual anulación da concesión.