UARX Space levará Galicia Calidade ao espazo

A marca Galicia Calidade viaxará ao espazo no primeiro vehículo de transferencia orbital deseñado en España pola empresa galega UARX Space, que se lanzará nos próximos meses desde a base aérea de Vandenberg, en California.

A conselleira de Economía e Industria, María Jesús Lorenzana, visitou este martes as instalacións da empresa no Porto do Molle, en Nigrán (Pontevedra), onde valorou que se trata dunha compañía única en España e destacou que está entre as cinco de todo o mundo en fabricar este tipo de sistemas propios capaces de manobrar no espazo.

OSSIE (Orbit Solutions to Simplify Injection and Exploration) é un vehículo de transferencia orbital deseñado para transportar satélites pequenos e medianos a diferentes órbitas e facilitar, así, que cheguen ao seu destino final. Permitirá a inxección de satélites en órbitas terrestres non tradicionais, arredor da lúa e en traxectorias ao espazo profundo.

Lorenzana mostrou o “orgullo inmenso” de toda Galicia por este fito dunha firma con “moitísimas posibilidades de crecemento dentro do momento económico e industrial actual”.

“Seguiremos acompañándoa, porque, dentro da Estratexia de Seguridade, Defensa e Aeroespazo, é unha das empresas que ten maior potencial”, subliñou.