Valtalia crece coa adquisición de Playdesa, empresa de embalaxe de plástico que move 25 millóns ao ano

Valtalia, a compañía ourensá especializada na xestión integral de residuos sólidos urbanos e industriais e no ciclo da auga crece orgánica e inorgánicamente. A firma presidida por César Pereira fíxose con Playdesa, empresa con sede en Salceda de Caselas (Pontevedra) especializada en embalaxe de plásticos e cuxa facturación supera os 25 millóns anuais.

A operación pechouse a finais do ano pasado, cando Valtalia Investments pasou a ser administradora única da compañía Plásticos y Desarrollos, cesando no seu cargo os administradores da empresa ata ese momento, os empresarios Daniel Osorio e Pablo Mondelo.

Playdesa foi fundada en 1975 e converteuse nun referente na fabricación de envases e embalaxes de plástico flexible. A operación de compra foi asesorada pola firma de banca de investimento Clearwater Corporate Finance, que indica que se trata dun “movemento de integración vertical que amplía significativamente a cadea de valor de Valtalia”.

Economía circular

Con esta integración, o grupo de xestión medioambiental “reforza o seu posicionamento no ámbito dos servizos sostibles e a economía circular”. “A combinación de experiencia industrial cun modelo de negocio orientado á sustentabilidade convérte esta integración nunha aposta coherente e de longo percorrido”, expón a compradora.

Con sedes en Pontevedra e Pamplona, Playdesa, con unha plantilla que ronda o cento de empregados, centra a súa actividade en solucións de packaging para os sectores da alimentación, industria e os bens de consumo.

Máis de 18 millóns en activos

Valtalia faise con esta operación cunha compañía que no ano 2024, último do que hai datos no Rexistro Mercantil, facturou 24,2 millóns de euros fronte aos 25,3 millóns do exercicio precedente. Con uns activos de 18,5 millóns de euros, presentaba un patrimonio neto de 10 millóns.

Con un resultado de explotación de preto de 800.000 euros, rematou o exercicio 2024 cun beneficio neto de preto de 500.000 euros fronte aos 1,25 millóns do ano anterior.

No seu último informe de xestión, os anteriores administradores de Playdesa indican que a compañía afrontou o impacto das medidas de imposto ao plástico. Non obstante, explicaban que as inversións realizadas nos exercicios anteriores, de catro millóns de euros, estaban destinadas a afianzar a firma en segmentos de negocio cun percorrido máis amplo, o que lles permitirá “sobrellevar a situación derivada dunha actuación lexislativa”.