Xeal desvela a súa gran aposta: arrinca a construción da súa fábrica de carbón vexetal cunha inversión de 28 millóns.

Xeal pon a primeira pedra da súa planta de carbón vexetal. A compañía propiedade de Energo-Pro celebrou este mércores en Dumbría este acto simbólico co que dá inicio ao proceso de construción dun proxecto clave dentro da súa aposta pola descarbonización e o seu compromiso por unha industria máis sostible, competitiva e con arraigo territorial.

O acto contou coa presenza de Alfonso Rueda, presidente da Xunta de Galicia; Jordi García Brustenga, secretario de Estado de Industria do Goberno de España; e Libor Sečka, embaixador da República Checa en España; así como representantes institucionais, autoridades autonómicas e estatais, directivos da compañía e do seu accionista, Energo-Pro.

Xeal optou para este acto por deixar á marxe formatos tradicionais (enterramento de cápsula do tempo ou dunha urna simbólica) para presentar seis lousas coas pegadas de traballadores e traballadoras. Trátase, segundo a compañía, de “unha acción cargada de simbolismo que conecta co lema do proxecto: Xeal non deixa pegada, pero o seu equipo si, en referencia tanto ao papel central das persoas como á redución da pegada de carbono que permitirá a nova instalación”

Xeal dedicará un investimento superior aos 28 millóns de euros para a posta en marcha destas instalacións que se ubicarán xunto ao centro produtivo de Xeal en Dumbría. Trátase dunha iniciativa que foi declarada Proxecto Industrial Estratéxico (PIE) pola Xunta de Galicia e que, ademais, contará co apoio do PERTE de Descarbonización Industrial, un instrumento impulsado polo Goberno de España para acelerar a transformación verde do tecido industrial.

“Unha infraestrutura clave”

Segundo subliña Xeal a través dunha nota de prensa, “a planta terá capacidade para producir entre 11.000 e 14.000 toneladas anuais de carbón vexetal, o que permitirá substituír progresivamente carbón fósil nos procesos produtivos e reducir de forma significativa as emisións de CO₂ asociadas á actividade industrial”.

“Hoxe non celebramos unha primeira pedra ao uso. O que poñemos en valor é un proxecto estratéxico, un compromiso industrial e, sobre todo, ás persoas que fan posible Xeal. A planta de carbón vexetal simboliza un principio que nos define: Xeal non deixa pegada, pero as súas persoas si”, destacou María Couto, CEO de Xeal.

A directiva galega engadiu que “esta planta de carbón vexetal é unha infraestrutura clave para garantir o futuro industrial de Xeal en Galicia. Permítenos transformar os nosos procesos produtivos, gañar autonomía en subministracións estratéxicas e avanzar cara a un modelo máis eficiente e descarbonizado. Ademais, destacou que “con esta nova instalación damos un paso decisivo para reducir a nosa pegada de carbono e aliñarnos cos obxectivos climáticos europeos, de España e Galicia, demostrando que é posible avanzar en sostibilidade sen renunciar a unha industria forte e competitiva.”

En paralelo, Jakub Fajfr, CEO de Energo-Pro, puxo de relevo o valor estratéxico do proxecto e o seu impacto a longo prazo. “Para Energo-Pro é un orgullo acompañar a Xeal nun proxecto que representa moito máis que unha investimento industrial: é un compromiso firme coa sostibilidade, a innovación e a industria do futuro”, recalcou. “A planta de carbón vexetal é un elemento estratéxico dentro do proceso de transformación industrial de Xeal e un exemplo de como a innovación tecnolóxica pode contribuír de forma real á descarbonización da industria pesada. Este proxecto reforza a competitividade de Xeal a longo prazo e consolida unha industria moderna, preparada para responder aos retos enerxéticos e medioambientais que afronta Europa“, precisou.