Xesgalicia e Unirisco entran na biotecnolóxica galega Batea Oncology
Constituída en 2024, Batea Oncology desenvolve novas tecnoloxías para o tratamento de enfermidades oncolóxicas como o glioblastoma.
Inmaculada Rodríguez, directora de Unirisco, junto al equipo de Batea Oncology
Comentarios
Xesgalicia e Unirisco desembarcan nunha nova iniciativa innovadora galega. As entidades de capital risco entraron en Batea Oncology, unha empresa biotecnolóxica constituída en 2024 e enfocada á investigación e desenvolvemento de novas tecnoloxías para o tratamento de enfermidades oncolóxicas, como o glioblastoma (un tipo de tumor que afecta ao sistema nervioso central).
Ámbalas dúas participaron nunha rolda de financiamento que ten como obxectivo avanzar na fabricación do dispositivo médico GlioHook, que se implanta no momento da cirurxía para capturar células tumorais residuais que son responsables das recaídas. Este desenvolvemento de Batea Oncology permite, ademais, mellorar a efectividade do tratamento con radioterapia.
O obxectivo da biotecnolóxica, que naceu co apoio do Hospital Clínico Universitario e o Instituto de Investigación Sanitaria de Santiago de Compostela, é iniciar un ensaio clínico piloto en 2026. De feito, os fitos vinculados á financiamento na que participaron Unirisco e Xesgalicia son conseguir a fabricación do dispositivo en condicións GMP (Boas Prácticas de Fabricación), a realización dos tests preclínicos de biocompatibilidade e toxicidade por entidades independentes certificadas, e, como última etapa, lograr a autorización da AEMPS (Axencia Española do Medicamento e Produto Sanitario) para poder iniciar as probas en pacientes de glioblastoma no ano 2026.
Ademais, Batea foi seleccionada pola Asociación Española contra o Cancro no seu programa IMPACTO en 2024, e ten o selo IEBT e ENISA.
Esperanza de vida media
O tratamento de glioblastoma non cambiou nos últimos 20 anos, desde que en 2005 se estableceu o tratamento actual, que consiste en cirurxía seguida de quimio e radioterapia (coñecido como protocolo Stupp). Con todo, os pacientes teñen moi mal prognóstico, cunha esperanza de vida media de 15 meses desde o diagnóstico.
A pesar de que se investigou moito en novas terapias, ningunha chegou de maneira eficiente á clínica, en parte pola dificultade de atravesar a barreira hematoencefálica. O dispositivo GlioHook ten varias vantaxes competitivas que o posicionan como unha alternativa real xa que ademais de favorecer a focalización da enfermidade e potenciar o efecto da radioterapia intégrase facilmente na práctica clínica habitual, cubrindo o gap terapéutico entre a cirurxía e o inicio da radioterapia.
Xesgalicia e Unirisco
Unirisco é unha sociedade privada de capital risco que naceu impulsada polas universidades galegas e na que colaboran empresas como Inditex, Gadisa, San José ou Abanca, entre outras. Son unha alavanca importante do ecosistema innovador galego, investindo en fases temperás de startups de base científica ou tecnolóxica e incorporando criterios de impacto social nas súas apostas. Na entidade explican que decidiron investir en Batea Oncology porque “conta cun equipo de tal nivel profesional e científico que logrou grandes avances para dar solucións a unha patoloxía moi grave, como é o glioblastoma”.
Xesgalicia, pola súa parte, é a xestora de fondos de capital risco da Xunta, nos que move arredor de 200 millóns de patrimonio. Acudiu á rolda de financiamento con Galicia Innova Tech, un fondo focalizado en compañías innovadoras, desde fase semente ata Series A, en sectores como IT, biotecnoloxía, agro-food tech, ciencias da saúde, aeroespacial e industria 4.0.
