Xilonor, o proxecto impulsado por Finsa e Goiriz, bate récord de ingresos e recorta un 44% as súas perdas.

En 2020 naceu Xilonor, a primeira empresa galega especializada na fabricación de paneis de madeira contralaminada (CLT) para o seu uso en construción, impulsada por Finsa (90%) e Madeiras Goiriz (10%). A compañía con planta en Coirós pechou o exercicio pasado acadando o máximo de facturación desde a súa constitución, con 5,19 millóns, e reducindo un 44% as súas perdas.

Segundo a documentación enviada ao Rexistro Mercantil e consultada por Economía Digital Galicia a través da solución analítica avanzada Insight View, Xilonor conseguiu reducir os números vermello pasando dos 454.835 aos 253.131 euros. Pola súa banda, o resultado de explotación, propio da actividade da empresa, tamén reduciu a súa cifra negativa ao descender dos 527.912 aos 266.155 euros.

O proxecto iniciouse co obxectivo de aproveitar as novas tendencias da construción para levantar edificios máis sostibles e con menor pegada ambiental. Neste sentido, o CLT é un tipo de laminado que se caracteriza pola súa lixeireza e resistencia, algo que permite axilizar as construcións.

A compañía pechou o exercicio con uns activos de 13,22 millóns, lixeiramente por debaixo dos 14,06 do ano anterior. En canto ao patrimonio neto, tamén experimentou un pequeno descenso ao pasar dos 6,13 millóns en 2023 aos 5,88 ao ano seguinte.

“Aínda que a sociedade ten un fondo de manobra de -1.232.573 e un resultado negativo de 253.131 euros en 2024, atópase en fase de optimización da súa actividade e maior introdución do produto no mercado, co que se espera a partir do 2025 iniciar a senda de resultados positivos”, explica a compañía na memoria que acompaña ás contas na que detallan que “a sociedade non se atopa en desequilibrio patrimonial”.

O valor do CLT

A compañía explica na súa páxina web que a construción “ten que avanzar inevitablemente” cara a un tipo de construción máis eficiente e sostible na que se aposte por construír edificios máis respectuosos co medio ambiente, algo que se consegue “priorizando o uso de materiais de construción que usen materias primas locais, con menor impacto ambiental tanto na súa fabricación como no transporte cara á obra, que sexan renovables e que axuden a reducir as emisións de gases de efecto invernadoiro”.

Segundo detallan o CLT é “un dos materiais estruturais con menor pegada de carbono” xa que compensa as baixas emisións de CO2 emitidas na súa produción coa cantidade de CO2 que absorbe da atmósfera cando é árbore. A iso habería que sumar que, tendo en conta que, á igualdade de peso, a madeira resiste máis que o formigón ou o aceiro, o CLT permite” a mesma resistencia a flexión mediante unha estrutura de madeira máis lixeira”.

Os números de Finsa

Finsa, xigante galego do taboleiro, pechou o 2024 cunha facturación de 1.208 millóns, un 1,2% por debaixo dos 1.223 millóns colleitados o ano anterior. O ebitda recorrente pasou dos 234,5 millóns de euros aos 197,6 millóns mentres que o resultado de explotación descendeu ata os 126,7 millóns de euros, o que representa unha baixada do 30,2%.

A compañía incrementou a súa plantilla dos 3.277 a 3.342 traballadores no último ano (o 95% conta con contrato indefinido) e tamén se volcou en materia de investimentos. En concreto, estas incrementáronse desde os 76 millóns de euros rexistrados en 2023 ata os 83 millóns en 2024.