Xogo de tronos de Inditex e Santander no Ibex: suman o 30% da súa capitalización en plena batalla por lideralo
Quinta e sexta empresa máis valiosa da zona euro e as dúas únicas españolas dentro do top 100 mundial, a multinacional de Amancio Ortega a pesar de perder o primeiro posto no Ibex xa só ten por diante no sector da moda a LVMH en canto a valor bursátil.
Inditex e Santander sitúanse como primeira e segunda empresa por capitalización no Ibex, seguidas por Iberdrola. Montaxe: Pablo Ares Heres
Comentarios
Inditex perdeu en xuño o liderado do Ibex por valor bursátil, un trono do que non se levantaba desde o ano 2022, cando debido á guerra de Ucraína e o medo dos investidores ao impacto da saída do mercado ruso recibiu o sorpasso de Iberdrola. Santander, o novo número un, non accedía a este posto desde hai oito anos. A aposta do mercado por ambos valores ao calor do acordo de paz entre Estados Unidos e Irán e o favor dos analistas fai que a súa particular competición se traduza nun aumento notable da capitalización global do Ibex35, que xa supera os 1,2 billóns de euros. Deste importe, só a cotizada de Ana Patricia Botín e a de Marta Ortega suman máis de 360.000 millóns de euros, o 30%.
É máis, se se ten en conta a capitalización de máis de 147.000 millóns de euros que exhibe na actualidade Iberdrola e os 128.117 millóns do BBVA, só catro valores aglutinan practicamente a metade do valor bursátil conxunto do Ibex, que alcanzou o billón de euros por primeira vez na súa historia a finais do ano pasado, o que amosa a súa revalorización a pesar das presións xeopolíticas a nivel global.
Semana histórica do Ibex
O pasado venres, o Ibex alcanzou un novo récord histórico, ao finalizar a semana por riba dos 19.800 puntos despois de revalorizarse un 2,19% semanal, nun contexto marcado polo memorando de entendemento asinado entre Estados Unidos e Irán, un factor que derivou na baixada do prezo do cru ata os 71 dólares.
Neste escenario, Banco Santander rematou a semana cunha capitalización bursátil de 182.412 millóns de euros, algo máis de 4.000 millóns por riba de Inditex, que presenta un valor para os investidores de 178.273 millóns. Con todo, a perda do trono do Ibex non parece supoñer maior problema para os de Amancio Ortega, máis aló do estético. E é que a firma volve encamiñarse aos seus máximos históricos e sitúase xa como a empresa de moda máis valiosa do mundo, unicamente superada polo xigante do luxo francés LVMH.
Ascenso nas finanzas e na moda
Co vento a favor no Ibex, na última semana, tanto o Santander como Inditex escalaron posicións entre as empresas con maior capitalización da zona euro. Se hai uns meses se atopaban no posto sétimo e oitavo, a día de hoxe a financeira ocupa o posto número cinco e a matriz de Zara o número seis.
Só superadas no índice Euro Stoxx 50 pola tecnolóxica holandesa Asml, LVMH, Siemens e L´Oreal, a pesar de que Inditex perdeu o trono do Ibex en España, a nivel europeo logrou dar o sorpasso á histórica segunda compañía do luxo tras Louis Vuitton, Hermès, a creadora do icónico bolso Birkin. Se ben o seu valor bursátil adoita estar por riba da multinacional de Arteixo e mesmo en abril do ano pasado conseguiu superar ao grupo da familia Arnault, a compañía sufriu especialmente a crise do luxo e o impacto da guerra do Oriente e no que vai de 2026 acumula un retroceso no valor da súa acción dun 22,67%.
Así as cousas, se Inditex na zona euro se converteu na segunda gran cotizada do sector da moda tras LVMH, Santander, pola súa banda, posiciónase como a primeira entidade financeira por valor en bolsa dentro da UE.
Ranking global
Con unha revalorización no que vai de 2026 de máis de un 24% no caso do Santander e dun 3,24% para Inditex, ambas compañías tamén son as únicas da bolsa española que se sitúan dentro do top 100 de grupos mundiais con maior capitalización bursátil.
Non obstante, a súa posición é distinta dentro dos seus particulares sectores. Mentres que, a nivel global, Inditex é o segundo grupo por capitalización bursátil no segmento da moda por detrás de LVMH e por riba de Hermès, a americana TJX Companies, de grandes almacéns; Fast Retailing, a matriz de Uniqlo, Dior, Cintas, Ross Stores, Nike e Adidas; o banco Santander posiciónase no número 14 das grandes financeiras cotizadas.
O sector financeiro, con moita maior competencia, está liderado por JP Morgan, Bank of America, China Construction Bank, Morgan Stanley e HSBC.
¿Continuará a loita no Ibex?
Con Inditex e Santander en alza, representando un terzo da capitalización do Ibex, e coas perspectivas dos analistas, queda por saber se o baile polo liderado do índice de referencia da bolsa española continuará. Todo fai indicar que si.
Co título do Santander intercambiándose a 12,42 euros, o banco atópase xa preto do prezo obxectivo medio dos analistas. Aínda así, un dos últimos informes sobre o valor, o de UBS, posiciónao como unha das entidades europeas con maior potencial de retorno para os accionistas.
No caso de Inditex, os analistas ven aínda un gran potencial de mellora. Co título a 57,2 euros ata catro analistas cren que podería superar os 60 euros. En concreto, os últimos informes do pasado mes de xuño de RBC (63 euros) e de UBS, Morgan Stanley e Kepler, que sitúan a acción por riba dos 62 euros.
