A Xunta tranfere sete millóns en terreos a Xestur para crear solo industrial.
A xestora de parques empresariais do Goberno galego amplía capital por 7,3 millóns para recibir activos de solo procedentes do Instituto Galego de Vivenda e Solo.
A conselleira de Economía e Industria, María Jesús Lorenzana, acompañada pola directora xeral de Estratexia Industrial e Solo Empresarial, Margarita Ardao, visitou este sábado en Meaño (Pontevedra) – XUNTA
Comentarios
Xestur, a xestora e promotora de parques empresariais da Xunta, executou unha ampliación de capital de 7,3 millóns. Non é un movemento novedoso para a entidade, que realizou múltiples deste tipo para poder afrontar os vencementos da débeda que mantía con Abanca e que liquidou anticipadamente en 2019. Agora as motivacións da empresa pública son outras. A ampliación de capital realízase para absorber activos valorados nese importe de 7,3 millóns procedentes do Instituto Galego de Vivenda e Solo. Este traspaso é o primeiro doutros que se realizarán desde a Consellería de Vivenda a Xestur, cuxo valor non concretou o Goberno galego. O obxectivo é que os terreos se convertan en futuro solo empresarial.
Ao final do ano pasado, as consellerías de María Jesús Lorenzana e María Martínez Allegue percorreron o camiño inverso. Xestur traspasou 100 millóns en activos de solo residencial á nova empresa pública de vivenda, Vipugal, co obxectivo de incrementar o parque público e aumentar a oferta de aluguer social. Os traspasos agora no sentido inverso veñen a completar esta estratexia, afondando na separación dos activos de solo, uns destinados á implantación de empresas baixo o paraugas da Consellería de Economía e os residenciais baixo o mando da Consellería de Vivenda.
Os proxectos de Xestur
Xestur dedícase á urbanización de terreos e comercialización de solo industrial. Entre 2015 e 2025, vendeu 673 parcelas de 1,9 millóns de metros cadrados, polos que ingresou 127,5 millóns, aos que se suman tres proxectos singulares xa escriturados, un de 22,2 millóns por 466.137 metros cadrados; outro de 1,3 millóns por 25.000 metros cadrados; e outro de 2,1 millóns por 39.000 metros cadrados. A entidade ten compromisos de venda sobre 19 parcelas máis por un valor de 4,2 millóns. De sumar todo, a xestora de solo industrial alcanzaría os 2,5 millóns de metros vendidos por 157,4 millóns.
Este ano adxudicou dous contratos para a ampliación dos parques empresariais de San Cibrao, en Ourense, e de Lalín, tarefa que executarán as construtoras Prace e Lantania, no caso do polígono ourensán, e Francisco Gómez e Taobada e Ramos na capital do Deza.
