A sombra da moción de censura paira sobre Lugo e o PSOE acusa o PP de “corrupción política”

• Besteiro aposta desde Barcelona por «frenar a ultradereita» e impulsar «unha transición verde xusta»
• Besteiro critica a falta de “rumbo, planificación e proxecto” da Xunta: “Galicia perde tempo con este Goberno”

Planea sobre Lugo a posibilidade dunha moción de censura que podería cambiar a cor do Goberno do concello tras un cuarto de século de mandato socialista, despois de que José López Orozco recuperase o concello. Aínda que non hai declaracións oficiais, dáse por feito que existen contactos entre os populares encabezados por Elena Candia e María Reigosa, a edil que abandonou as filas do PSdeG.

Fontes populares consultadas por Europa Press evitan por agora dar por pechada unha moción de censura, pero non negan os contactos e trasladan que, ante a conxuntura que hai no Concello de Lugo e unha xestión que censuran, “non se pode descartar” ningún escenario.

A aritmética da moción

Por pechada tampouco o dá a propia Reigosa, pero si cambiou de postura en relación a semanas atrás. Pasou de descartar a moción de censura a considerar que é “necesaria”.

Se finalmente decide que si, o PP terá as sinaturas suficientes para impulsar un cambio de goberno liderado por Candia, cuxo grupo está integrado por 12 concelleiros –o bipartito de PSOE e BNG suman outros tantos (sete socialistas e cinco nacionalistas)–.

A sinatura de Reigosa é imprescindible nesta conxuntura e permitiría ao PP recuperar a Alcaldía dunha urbe, en mans do PSOE –en solitario ou en coalición co BNG– desde 1999. Candia converteríase na cuarta en ter o bastón de mando de Lugo nun convulso mandato local: precedérona a agora deputada Lara Méndez, Paula Alvarellos –quen faleceu tras sufrir un infarto–, e na actualidade o rexedor é Miguel Fernández).

Ante esta posibilidade, este luns, o secretario xeral dos socialistas galegos, José Ramón Gómez Besteiro, acusou ao presidente da Xunta e líder do PP galego, Alfonso Rueda, de “amañar nos despachos” un “pacto” para acceder ao goberno da cidade de Lugo.

Críticas de Besteiro

Unha “posible” moción de censura que, se se produce ou se plantea, avisou, “non é política, é corrupción política e traizoar a confianza da xente”.

En rolda de prensa, Besteiro sinalou que o “verdadeiramente preocupante” disto é que “quen non ten límites” para chegar ao poder deste xeito, na súa opinión, “tampouco” os terá na forma de gobernar.

Neste sentido, cargou contra unha forma de facer política “baseada na confrontación e os atallos”, e contrapuxo ao “traballo serio” do actual goberno que encabeza Miguel Fernández, do que reivindicou “estabilidade e compromiso”, así como traballo “con rigor” e “pensando sempre no interese xeral”. Así, exemplificouno coa recente aprobación dos orzamentos.

“Se se confirma esa moción, teremos enriba da mesa un pacto cociñado por Alfonso Rueda para amañar nos despachos o que o PP leva 27 anos sen conseguir en Lugo cos votos da cidadanía”, criticou o líder socialista.

Besteiro recriminou que, de saír adiante a moción, será “aproveitando momentos tristes e dolorosos” para o Partido Socialista, que sufriu tres perdas nos últimos tempos.

“Iso non é facer política, é cruzar liñas que nunca se deberían cruzar”, afondou, para incidir en que “ao PP non lle saen as contas” e “por iso promove acordos que traizoan a vontade popular”. E apostilou: “Cando se mercadea, estamos ante unha degradación da democracia”.

Deste xeito, volveu a falar de “corrupción política, por falta de integridade” e resaltou que Lugo “merece o contrario: seguir avanzando cun goberno serio, de boas persoas que sigan ao timón cun proxecto sólido como o que se está a demostrar” e “un liderado que constrúa para todos”.