Besteiro cre que o caso Zapatero “resolverase positivamente” e lembra que viviu “unha situación similar”
O secretario xeral dos socialistas galegos apela á presunción de inocencia e indica que pode falar “cunha especial autoritas” debido ás causas xudiciais que o afastaron case unha década da política.
O portavoz do PSG-PSOE, José Ramón Gómez Besteiro, durante o Debate sobre o Estado da Autonomía, a 8 de abril de 2026 – Álvaro Ballesteros – Europa Press
Comentarios
O secretario xeral do PSdeG, José Ramón Gómez Besteiro, augurou que a imputación do expresidente socialista José Luis Rodríguez Zapatero “resolverase positivamente” e apelou, como xa fixo en días anteriores, “á presunción de inocencia” e a “deixar traballar á xustiza”. O político lucense lembrou a situación que el viviu coas imputacións ás que o someteu a xuíza Pilar de Lara. O dirixente chegou a sumar dez imputacións, o que forzou a súa dimisión como líder do PSOE galego e candidato á Xunta en 2016. Tras anos de atrasos, todas as causas foron arquivadas, quedando totalmente libre de cargos, co que retomou a súa vida política en 2022.
“Eu creo que podo falar cunha especial ‘autoritas’ porque eu vivín unha situación similar“, apuntou. Besteiro pronunciouse ao respecto nunha entrevista concedida a RNE este domingo.
Preguntado polos feitos recentemente coñecidos, o líder dos socialistas galegos sinalou en dirección a un “nerviosismo na dereita“; tamén aquí en Galicia, de xeito que instou ao presidente da Xunta, Alfonso Rueda, a “traballar máis” en cuestións como a vivenda ou a sanidade.
“Non vexo ese panorama tan bo que se aventura o PP”
En relación a declaracións deste sobre a maioría absoluta do PP en Galicia, tras os resultados de Andalucía, Besteiro opinou que, “cando sexan chamados a eleccións os galegos e galegas”, producirase “ese horizonte que se está producindo en España”, onde “o PP alíase coa ultradereita”.
“Aquel panorama tan bo que se aventura o Partido Popular, eu non o vexo. Ese nerviosismo que ten, esa ansia porque se fagan as eleccións porque teme, con razón, que dentro dun ano a situación non estea ben para chegar ao Goberno”, engadiu, referíndose agora ás próximas eleccións xerais.
Perspectivas boas para as municipais
De cara ás municipais de 2027, Besteiro apoiouse nas “case 100 alcaldías” do PSdeG en Galicia para vaticinar que as perspectivas do partido “son boas”: “Onde gobernan os socialistas, as cidades e os pobos prosperan”. Neste sentido, asegurou que traballará para “mellorar os resultados” do ano 2023.
En concreto, con respecto a Lugo, aínda que o proceso de elección de candidatos para as municipais está aberto desde xuño, Besteiro considera que Miguel Fernández “non necesita ningún tipo de ratificación” como candidato: “É o alcalde Miguel Fernández e eu creo que o Partido Socialista optará por iso, pero somos un partido democrático”.
Neste sentido, lamentou, unha vez máis, a moción de censura coa que o PP arrebatou o goberno ao PSOE e ao BNG co voto da concelleira tránsfuga María Reigosa, que concorría nas listas socialistas. Así, cre que o seu papel no goberno local “é un paripé dirixido a xerarlle confianza”.
