O BNG só pedirá eleccións anticipadas se se demostra «a financiación ilegal» do PSOE
"Se estamos ante un caso de corrupción e se demostra que hai financiamento ilegal, igual que fixo o PP coa Gürtel, esixiremos a convocatoria electoral", avanzou a portavoz nacional do BNG, Ana Pontón.
Ana Pontón. BNG
Comentarios
O BNG marca a “liña vermella” para manter o seu apoio ao PSOE. A portavoz dos nacionalistas galegos, Ana Pontón, insistiu en que non esixirá a convocatoria de eleccións xerais ata que se demostre “financiamento ilegal do PSOE, como tivo o PP coa Gürtel“.
“Esa é a nosa liña vermella”, manifestou a preguntas dos medios este mércores en rolda de prensa pola entrada en Ferraz de axentes da Unidade Central Operativa (UCO) na sede nacional do PSOE na rúa Ferraz no marco dunha investigación da Audiencia Nacional no denominado caso Leire e, en concreto, sobre se se mantén na posición de non reclamar un adianto electoral.
Neste sentido, Pontón lembrou que o BNG xa sinalara “hai tempo” que tiña “unha liña vermella moi clara”: “Se se demostraba que estamos ante un caso de financiamento ilegal do PSOE, como o PP coa Gürtel, esa era a nosa liña vermella para que a cidadanía tome a palabra e decida que futuro quere”.
O BNG comparte a “indignación” pola “corrupción”
Ana Pontón recoñeceu que comparte a “indignación” que xera, ao seu xuízo, ver “como o PP e o PSOE salpican a vida pública con casos de corrupción”, insistindo en que “non todos” son iguais e que a política “é a ferramenta que temos para cambiar as cousas”. En todo caso, defendeu que a xustiza “ten que ir ata o fondo” e que “non se poden tolerar casos de corrupción”, “caia quen caia”, advertiu antes de reiterar que deben traballar para que “esa forma de actuar se erradique da vida pública”.
“Se estamos ante un caso de corrupción e se demostra que hai financiamento ilegal, igual que fixo o PP coa Gürtel, esixiremos a convocatoria electoral”, subliñou. A continuación, preguntada sobre a postura da súa formación en casos que non teñan que ver con financiamento ilegal, Ana Pontón expuxo que se hai casos de corrupción “hai que apartar esas persoas da vida pública”.
