Pontón pecha a porta ao fronte de esquerdas de Rufián e aposta por un BNG «coas súas siglas» nas eleccións xerais
"Se lle entregamos o noso voto ás forzas estatais, o que vemos é que unha vez que saen do noso país é esquecerse dos galegos e galegas", advertiu a líder do BNG.
Rolda de prensa do BNG no Hotel Barceló, en Ourense / BNG
Comentarios
A portavoz nacional do BNG pecha a opción de incorporarse ao fronte de esquerdas de Gabriel Rufián. Ana Pontón confirmou este venres que o Bloque desmarca esta iniciativa promovida polo portavoz de Esquerra Republicana de Catalunya no Congreso dos Deputados.
Segundo avanzou a líder da oposición en Galicia, os nacionalistas son “garantía de que non vai haber un Goberno de dereita ou extrema dereita”.
“En Madrid xogámonos unha parte do noso futuro, e se lle entregamos o noso voto ás forzas estatais, o que vemos é que unha vez que saen do noso país é esquecerse dos galegos e galegas”, recalcou, despois de avanzar o pasado luns que o partido “concurrirá coas súas siglas”.
Pontón realizou este anuncio nunha rolda de prensa celebrada este venres no Hotel Barceló, en Ourense, acompañada do portavoz nacionalista no Congreso, Néstor Rego, da senadora do BNG, Carmen da Silva, e do portavoz nacionalista no Concello de Ourense, Luís Seara.
Neste sentido, Pontón afeou que as “forzas estatais repiten o guión da discriminación” en Galicia e, consultada por xornalistas sobre o posible ascenso electoral do BNG tras a renuncia de Yolanda Díaz, subliñou que o partido fai “o seu labor” de forma “humilde”. “Se nos vai ben, será polo ben que o fagamos, e non polo ben que lles vaia a outros”, engadiu.
