Stellantis refúxiase en Vigo ante a crise da automoción e prepara novos lanzamentos
O director da planta de Balaídos, José Luis Alonso Mosquera, defende que o plan industrial "permanece inalterable" e debuxa un escenario "sen peche de plantas" ata 2030.
O director de Stellantis Vigo durante a asamblea de Ceaga / Europa Press
Comentarios
Stellantis suma e segue en Vigo. O director da planta de Balaídos, José Luis Alonso Mosquera, avanzou que o plan industrial da factoría automobilística olívica “permanece inalterable” e subliñou que a planta avanza xa na preparación de novos lanzamentos para dar resposta aos obxectivos de custo e de prazo marcados pola multinacional, sempre coa “máxima calidade”.
Durante a súa intervención na asemblea anual do Clúster de Empresas de Automoción e Mobilidade de Galicia (Ceaga), Alonso Mosquera defendeu a necesidade de cumprir coa esixencia e a disciplina na execución dos plans da compañía. Neste sentido, o directivo puxo en valor a importancia “determinante” do resto de empresas do sector para seguir creando o ecosistema da automoción en Galicia e adaptarse ao futuro.
Un horizonte “sen peche de plantas”
No seu discurso, a pesar de que non avanzou moitos datos sobre os novos lanzamentos, Mosquera desgranou a folla de ruta cara a 2030 anunciada por Stellantis nas últimas semanas, que inclúe tres novas plataformas multienergía e “sen peche de plantas”, senón ampliando as súas capacidades do 60% ao 80%.
Non obstante, o plan para a planta de Vigo, que vén de pechar 2025 con récord de produción con 555.000 vehículos en 2025, segue “inalterable”, dixo, aínda que apuntou cara a varios retos, como a redución da factura eléctrica, que ten un “impacto significativo” nos custos de produción da fábrica viguesa.
Ademais, pediu un marco laboral “estable, claro e previsible” para poder tomar decisións a longo prazo. Tamén valorou a importancia da colaboración público-privada, agradecendo o apoio da Xunta que foi “vital” para o sector nos últimos anos para xerar novo coñecemento.
