Lorenzana ve “a desinformación” como o gran risco dos proxectos mineiros en Galicia
A conselleira de Economía e Industria defende nun acto con empresarios na Coruña que os promotores deben trasladar unha parte dos beneficios ás comunidades nas que asentan os seus proxectos para evitar que caian en “discursos interesados e desinformación”.
A conselleira de Economía e Industria, María Jesús Lorenzana, nun acto coa Confederación de Empresarios da Coruña. Foto: Xunta
Comentarios
A conselleira de Economía e Industria, María Jesús Lorenzana, reivindicou este mércores nun encontro ante empresarios organizado pola patronal coruñesa de Antonio Fontenla o potencial enerxético da comunidade, lembrando que Galicia ten 18 das 34 materias críticas que a Unión Europea identificou como prioritarias. A Xunta acaba de presentar un plan mineiro polo que sacará a concurso a extracción en xacementos como Corcoesto, San Finx ou Santa Comba co obxectivo de mobilizar uns 7.000 millóns de euros. A este respecto, a dirixente advertiu que o principal risco de que estes proxectos non saian adiante non está en incumprimentos da normativa senón nun rexeitamento social debido á “a desinformación”.
Lorenzana indicou que, na actualidade e coas normativas en vigor, “é imposible que saia adiante un proxecto en Europa que non cumpra cos estándares ambientais máis rigorosos”. Así, sostén que, se a Xunta dá luz verde a un proxecto, é que cumpre con todas as garantías. Así, indicou que o gran problema está na controversia social e a “desinformación” que, ao seu xuízo, determinados “partidos políticos, sindicatos e colectivos” propagan sobre estes proxectos.
“Se algo pode parar estes proxectos non vai ser nin a falta de esixencia ambiental por parte da Xunta nin a falta de melloras técnicas dispoñibles por parte dos promotores, senón que pode ser a desinformación ou a mala información á cidadanía”, dixo, sen remitirse expresamente a Altri, pero indicando que “isto xa pasou”.
Mensaxe aos promotores
A conselleira, que sempre foi moi crítica tanto co BNG como cos colectivos ambientalistas que se manifestaron frontalmente contra o proxecto da fábrica de fibras téxtiles en Palas de Rei, argumentando que o seu posicionamento era político e non se axustaba aos datos técnicos, tamén fixo un chamamento aos promotores industriais. Así, insistiu en que os proxectos que se asenten na comunidade teñen que repercutir parte dos seus beneficios na poboación. “Esa é a única forma de loitar contra esa corrente ideolóxica instalada en partidos e organizacións”, opinou.
Na súa intervención, a titular de Industria tamén reiterou que é necesario que o Goberno central garanta a conexión eléctrica dos grandes proxectos da comunidade, así como as liñas de evacuación das novas producións eléctricas. Lorenzana lembrou que, aínda que hai proxectos que caeron polo camiño, na actualidade a Xunta tramita 15 proxectos industriais estratéxicos, en ámbitos como o hidróxeno verde, os centros de datos, baterías ou defensa, dos 12 deles atópanse na provincia da Coruña.
