Margarita Robles critica aos presidentes do PP por «non asumir as súas obrigas» nos incendios

O lume aviva a confrontación política, que Alberto Núñez Feijóo e os dirixentes autonómicos do PP, incluído Alfonso Rueda, teñen situado na dispoñibilidade de medios por parte do Executivo central, sobre o que non recae a competencia de previr e extinguir os incendios, pero que si dispón de recursos para colaborar coas comunidades autónomas. Os presidentes do PP acusaron ao Goberno de non entregar os medios solicitados ou de chegar tarde a unha das maiores ondas de incendios que viviu Galicia e España.

Neste escenario, a ministra de Defensa, Margarita Robles, reclamoulles aos dirixentes autonómicos do PP, aliñados co relato que emite Xénova, “responsabilidade” e “honestidade” sobre o sucedido, e incluso acusounos de “non asumir as súas obrigas” para previlos ante a incapacidade para responder ante o lume. Robles incluso apelou ás súas conciencias, un día antes de comparecer no Senado para explicar a actuación do seu departamento durante a crise.

A ministra explicou que poñerá de manifesto o labor das Forzas Armadas para loitar contra o lume, pero tamén dirá “o que non se fixo”. “As comunidades autónomas non asumiron as súas obrigas en moitísimos casos”, criticou en declaracións aos medios de comunicación desde a Base de El Goloso. Robles dixo non querer “entrar en polémicas e debates”, pero tamén pediu aos dirixentes do PP “responsabilidade”, xa que “eles saben perfectamente como se traballou desde o primeiro momento”.

Que sexan “valentes”

“Eu fago unha chamada ás conciencias de todos eles, que saben a verdade, por favor, que sexan valentes e que o digan”, indicou Robles, que sinalou ao presidente do PP, Alberto Núñez Feijóo, como influencia para que os baróns non recoñezan o labor do Goberno. “Eu pido que na política haxa honestidade e que non se falte á verdade”, subliñou.

En todo caso, garantiu que ela si alabará o labor das Forzas Armadas na extinción de incendios, “con moito honor, moito orgullo e moito agradecemento”. “Estiveron desde o minuto un e os presidentes autonómicos sábeno, estiveron á altura desde o primeiro momento”, engadiu a ministra. “Eu ouvín moi poucas palabras de agradecemento dos dirixentes do PP”, rematou.

Por outra banda, a titular da carteira de Defensa asegurou que a Unidade Militar de Emerxencias (UME) e os Exércitos continuarán loitando contra o lume e axudando á poboación “o tempo que sexa necesario”. “Non se vai escatimar ningún esforzo, como non se escatimou desde o 2 de agosto”, comprometeuse.