Pontón anima á manifestación contra a Xunta e ve unha «xestión neglixente» cos incendios
A voceira nacional do BNG censura a "falta de medidas" e anuncia a súa presenza na concentración deste domingo que convocou a plataforma 'Lumes Nunca Máis'.
Ana Pontón interviene durante una reunión del Consello Nacional del BNG
Comentarios
Ana Pontón intensifica o seu discurso debido á onda de incendios. A voceira nacional do BNG chamou a participar na concentración convocada este domingo en Santiago de Compostela, en defensa do monte galego e para demandar unha nova política forestal.
“Hai que dicir alto e claro que queremos un monte limpo, multifuncional e con futuro”, defendeu nunha rolda de prensa. Ana Pontón aliñase, deste xeito, coas mobilizacións convocadas pola plataforma Lumes Nunca Máis, nas que participan máis de 60 asociacións sociais, sindicais e ecoloxistas.
Durante a súa intervención, Pontón criticou a actitude do presidente autonómico, Alfonso Rueda, na súa comparecencia parlamentaria, cualificándoa de “espectáculo lamentable”, á que chegou “como se non pasase nada”. “Actuou con soberbia e prepotencia, sen a máis mínima autocrítica e minimizando o impacto do lume e as súas consecuencias, un exercicio de irresponsabilidade e desprecio sen precedentes”, reprochou.
Pontón ve “falta de medidas”
A líder nacionalista, sinalou que a política forestal e de abandono do PP é “terrible” e que, ante a “falta de medidas”, a comunidade “vai seguir ardendo sen que se aborden as consecuencias estruturais que hai detrás” destes incendios que arderon 143.000 hectáreas segundo os datos do satélite Copernicus.
“É terrible, pero é así de duro, se se dan as mesmas condicións Galicia volverá a arder, ante un Goberno do PP empeñado en manter unha política forestal que converte o monte nun polvorín”, lamentou. En contraposición, Pontón destacou algunhas das medidas que propón a súa formación no plan integral Da cinza á vida – que levarán ao Parlamento- para actuar fronte aos incendios: Aumentar a 100 metros as faixas de seguridade das vivendas; recuperar e reforestar a superficie en mosaico.
Tamén, citou outras como realizar tarefas de limpeza e de prevención, duplicando os fondos de prevención en dous anos e garantindo que se executen; ampliar a moratoria de plantación de eucalipto, e revitalizar o medio rural.
