Xesgalicia activará un fondo de 40 millóns para impulsar proxectos de tecnoloxía civil e militar

A Xunta activará un Fondo de Investimento en Tecnoloxías Duais (civil e militar) en XesGalicia (40 M€) para apoiar proxectos e creará unha área específica dentro da Oficina Económica do Igape para ofrecer asesoramento ás empresas.

Así o indicou este luns a conselleira de Economía e Industria, María Jesús Lorenzana, na clausura dunha xornada na que se presentou a empresas e entidades vinculadas a estes sectores a estratexia aprobada pola Xunta neste ámbito para abrir con eles un proceso de diálogo estratéxico.

Lorenzana explicou que o Executivo galego vai poñer en marcha “convocatorias públicas de Compra Pública Precomercial, seguindo o mesmo modelo que se empregou para o sector aeroespacial, que foi pioneiro en España: os acordos de asociación”. Tamén se crearán consorcios de empresas e centros tecnolóxicos e publicarase este mesmo ano unha primeira convocatoria de axudas específica para facilitar a incorporación de novas empresas ao sector.

Socios estratéxicos

A conselleira anunciou a intención da Xunta de convocar a finais deste ano a primeira convocatoria que definirá que empresas e centros tecnolóxicos van traballar da súa man para “impulsar a industria da seguridade, a defensa e o aeroespazo e que programas conxuntos de investimento se van executar nos próximos cinco anos”.

“Queremos coñecer de primeira man as vosas necesidades reais a curto, medio e longo prazo para adecuar os instrumentos de apoio e investimento que estamos planificando e, deste modo, poder así obter os mellores resultados que permitan impulsar na Comunidade unha industria de seguridade e defensa que integre, tamén, o sector do aeroespazo”,

O obxectivo é mobilizar todo o potencial industrial e tecnolóxico de Galicia no campo da defensa e as tecnoloxías de aplicación dual e xerar unha demanda importante de produtos, sistemas e servizos, seguindo as prioridades marcadas por Europa. “O que nos pide a Comisión Europea a gobernos e administracións é que traballe