Alcoa inxecta 55 millóns na súa planta de Noruega mentres o Goberno e o comité retoman o seguimento de San Cibrao

Alcoa investirá 665 millóns de dólares, uns case 55,5 millóns de euros ao cambio, para ampliar a capacidade de fundición e incluír contido reciclado no proceso de moldeado na súa planta de Mosjøen en Noruega. O anuncio da multinacional con sede en Pittsburgh prodúcese na antesala da nova reunión de seguimento do acordo de viabilidade da planta de San Cibrao. 

A compañía informou nun comunicado que a inversión na planta norueguesa “achega beneficios estratéxicos á empresa ao seguir ofrecendo produtos de aluminio con baixas emisións de carbono que os nosos clientes demandan nun mercado clave, ao tempo que incorpora por primeira vez aluminio reciclado posconsumo nos seus produtos”.

Tal e como detallan, dende 2020 a compañía investiu uns 180 millóns de dólares, máis de 153 millóns de euros ao cambio, en proxectos orientados ao mantemento e obtención de rendibilidade da fundición. “Esta inversión adicional de 65 millóns de dólares permitirá ampliar e modernizar a planta de fundición de Mosjøen, aumentando a capacidade de produción ata en 75 000 toneladas”.

O proxecto de Alcoa para Mosjøen

O proxecto para a planta norueguesa inclúe unha nova liña de fundición de molde aberto, fornos de fusión e melloras adicionais que permitirán aumentar a súa capacidade de produción. Explican desde a multinacional que a modernización tamén permitirá unha carteira máis ampla de aliaxes para fundición, ofrecendo maior flexibilidade no tamaño e formato dos lingotes, unha maior diversidade de aliaxes e mellores capacidades de contido reciclado.

«Esta inversión sitúa a Alcoa á vangarda no subministro de aluminio con baixas emisións de carbono, ao tempo que xera valor a longo prazo para os nosos clientes e accionistas», declarou William F. Oplinger, presidente e director executivo de Alcoa. «O aumento da capacidade, xunto coas capacidades de reciclaxe, posiciona a Mosjøen como un piar fundamental do subministro de aluminio con baixas emisións de carbono en toda Europa».

A factoría de Mosjøen é “un dos maiores empregadores industriais do norte de Noruega”, con máis de 700 traballadores directos e un impacto rexional significativo. “A inversión contribuirá a garantir a actividade, o emprego e a experiencia a longo prazo na rexión de Helgeland, ao tempo que apoia aos provedores locais e contribúe á creación de valor industrial en Noruega”. Prevese que o proxecto de modernización se complete por fases, e que a posta en marcha e o aumento gradual da produción avancen ao longo de 2028.

Reunión de seguimento de Alcoa San Cibrao

A Secretaría de Estado de Industria convocou unha reunión de seguimento do acordo de viabilidade da planta de Alcoa, situada en San Cibrao, para este venres en A Coruña.

Segundo informaron fontes do comité de empresa, a xunta terá lugar o día 15 ás 12.30 horas na delegación do goberno na cidade herculina.

En outubro do pasado ano a conselleira de Economía e Industria, María Jesús Lorenzana, e o comité de empresa de Alcoa reclamaron ao Goberno central a convocatoria urxente da comisión de seguimento. A reunión anterior tivo lugar o 19 de marzo de 2025 en Madrid.