Alfonso Rueda: «Este Atlas demostra que as empresas van moito máis alá do simple beneficio económico»

O presidente da Xunta, Alfonso Rueda, pechou a presentación da sexta edición do Atlas Galego da Empresa Comprometida, nun discurso no que mostrou o apoio do Goberno galego ao sector empresarial e avanzou medidas para protexer a actividade produtiva dos impactos derivados do conflicto en Oriente Medio. Foi o compromiso do dirixente galego nun acto que medía, precisamente, o compromiso das propias empresas coa creación de riqueza sostible en Galicia.

Rueda puxo en valor precisamente isto, a capacidade do proxecto impulsado por Economía Dixital Galicia para reunir nun informe unha gran cantidade de organizacións que están a traballar para facer as cousas cada vez mellor. “O lucro económico é absolutamente lexítimo, para iso traballa unha empresa. Pero hai cada vez máis que pensan que non todo comeza e remata aí. Este Atlas reflicte que hai moitas empresas que pensan que hai que facer algo máis. Seguramente, estas empresas que se esforzan en cumprir con eses moitos outros motivos que impulsan a súa actividade creo que ese esforzo acabará redundando en máis beneficios e máis pegada no territorio”, dixo o presidente da Xunta.

O dirixente galego tamén puxo en valor a traxectoria do Atlas Galego da Empresa Comprometida e apuntou que os seus propios indicadores van radiografando os novos elementos que se incorporan ás prácticas empresariais e que chegaron para quedar moito tempo, como pode ser a intelixencia artificial. “Estes diagnósticos serios e fiables que nos serven de consulta e orientación creo que son moi importantes”, asegurou.

Do apagón á guerra

Rueda lembrou que non puido asistir á presentación de resultados do Atlas o ano pasado porque se celebrou xusto despois do apagón en España, unha crise de gran gravidade cuxas causas “seguimos sen saber ben un ano despois”, aínda que, apuntou o presidente da Xunta, algunhas revelacións deixan claro que “os dogmas e posturas inamovibles non levan a ningunha parte”.

Ao fío desa crise, explicou que agora estamos noutra situación “igualmente difícil”, coa incidencia do conflito en Oriente Medio e a incerteza e impactos macroeconómicos que diso se derivan. Rueda puxo en valor que as medidas adoptadas polo Goberno central detraerán 40 millóns mensuais dos orzamentos da Xunta, o que supón un “esforzo colectivo” que, segundo criticou, non foi dialogado nin consensuado por parte do Executivo de Pedro Sánchez.

Non cuestionou o plan o dirixente autonómico, aínda que xa avanzou que “haberá que tomar outras medidas, sobre todo para as empresas”. Aludiu á necesidade de garantir circulante, de axudas directas e de protexer investimentos que se puxeron en marcha noutro escenario xeopolítico. “Temos un tecido asociativo, sobre todo sectorial, que funciona moi ben e que fará todo máis sinxelo. Estabamos nun bo momento e así temos que seguir. Galicia estaba a medrar e ten que seguir medrando con empresas resilientes e comprometidas. Desde a Xunta, intentaremos facer a nosa parte cos estímulos directos e para xerar un marco de estabilidade, pacífico e seguro, no que se poida traballar e corrixir os erros de maneira cada vez máis áxil”, reivindicou.