Multitudinaria marcha en Vigo polo 8-M en defensa da “resistencia feminista”

Miles de persoas manifestáronse este domingo, 8 de marzo, en Vigo con motivo do Día Internacional da Muller, con consignas que aluden ás diferentes violencias que sofren as mulleres, pero onde tamén cabe a mención á guerra. Esta é unha das convocatorias apoiadas por Marcha Mundial das Mulleres, que reclama “terra viva, pobos libres e vidas dignas” e, no seu manifesto, defende “un feminismo de clase, antirracista e internacionalista”.

Unha gran pancarta, precedida por un mantón de ‘patchwork’, da plataforma viguesa Resposta Feminista -unha das entidades adscritas a esta convocatoria unitaria- lidera a protesta coa consigna ‘Frente ao medo e o fascismo, a resistencia é feminista’. Ao mesmo tempo, escoitanse cánticos como: “Se tocan a unha, tócanos a todas”, “Imos desertar as tarefas do fogar” e “Nin guerra que nos mate nin xuíz que nos oprima”.

Esta gran manifestación foi precedida por outra durante a mañá, na que se congregaron, segundo a organización, arredor de 15.000 persoas.

O resto de cidades e localidades galegas tamén celebran durante esta tarde as súas respectivas mobilizacións. Por exemplo, na Coruña tamén saíu ás 18.00 horas desde o Obelisco e en Santiago partirá ás 20.00 horas desde a Praza 8 de Marzo.