O Goberno pide “paciencia” á Xunta polo expediente de Bruxelas pola AP-9: informará “cando estea resolto”

Pedro Blanco, delegado do Goberno en Galicia, sinalou este martes que o Executivo central informará á Xunta do procedemento que tramita a Comisión Europea sobre a AP-9 cando estea “resolto” e non “papel por papel”.

Así se pronunciou ao ser preguntado pola decisión do Goberno galego de dar un mes de prazo ao Executivo estatal central para que lle remita a documentación sobre o proceso de infracción aberto pola Comisión Europea (CE) en relación á prórroga da AP-9 ou levará o asunto aos tribunais.

Sobre este asunto, o delegado sostivo que o presidente da Xunta ten que ter “paciencia” porque “se non está resolto o procedemento” por parte da CE parece “razoable” que “se lle remita toda a documentación” e non “papel por papel”.

“Teñen que ter paciencia porque a resolución non está finalizada, o procedemento está aberto e o que se trasladará é cumprida información unha vez que o procedemento estea resolto”, insistiu.

Dito isto, asegurou que o Executivo estatal foi o único que puxo enriba da mesa axudas para os usuarios da AP-9, uns apoios “millonarios” para que os viaxeiros poidan ver “aliviados” os custos e salvar un “problema” que “xerou o PP cando asinou a ampliación da concesión”.